Mulai Tobat Palan-palan

"AMA ada dengar ko sonde. Sakarang ini banyak kejadian seperti orang buang anak, orang bunuh diri, orang bakalai sampai ada yang mati. Orang maen bunu sa. Beken manusia su ke anak ayam sa."

Bai Ndu dudu ko bacarita deng Ama Tobo. Ama Tobo su berapa hari ni laen. Su son mau pi pak laru lai. Su tau sakarang ini idop makin berat. Baitua mau berubah. Bangun pagi dia harus berdoa dolo baru pi kas makan sapi. Kalo belom berdoa Tobo son akan buat apa-apa.

Biasa kalo mo pi cari makanan untuk kas ke sapi dong. Pas pulang, Ama Tobo kaget. Mau silih Bai Ndu, tau-tau baitua su dudu deng dia pung bini ko ada bacarita.

Ama Tobo pikir dalam hati apa yang dia dapat di persekutuan doa minggu lalu. Kebetulan dong pi ibadat dia dengar firman te sakarang ini muncul masalah di mana-mana.

"Katong sakarang harus melihat dengan positif semua kasus, karena itu memang harus terjadi. Beta lia dunia ini makin parah dengan masalah. Apalai di katong pung kota ini. Kalo botong ikuti berita-berita, bisa lihat bahwa masalah makin banyak."

Pas dengar bagitu, Ina Feok ada malerok ke Bai Ndu ko tutup mata seblah. "Kemarin sa ada orang yang buang anak di katoran. Dan masih banyak kasus kejahatan yang muncul sakarang. Semoga dong tobat palan-palan su." **