tombo tombo

Lalong Bakok Du Lakon, Eko Ro'eng Du Kolen

HITU de tara mangan kapu lami manuk one wie ho'o bo, kudut meu keta karong salang lakon ne, rantang nenteng tilun eme senget toing de ema guru.

POS KUPANG.COM, RUTENG -- "HITU de tara mangan kapu lami manuk one wie ho'o bo, kudut meu keta karong salang lakon ne, rantang nenteng tilun eme senget  toing de ema guru, agu buta matan te lelo surak. Kudut lalong bakok keta du lako ne, lalong rombeng koe du kolen. Hitu taungs tombo ngong tombo toe kop patut toe naun di'a uratm hau manuk."

Nenggitu torok de mekas Polus du pande manuk wuat wa'i diha Nadus du wie hitu. Eok! Keta runing de manuk bakok hitu woko kebut wulun. Labok keta taungs toing de ende agu eman nenggitu kole toing de  pa'ang olo ngaung musi latangt  hi Nadus. Wale kaut le ngetuk agu imus liha toing situ.

Ho'o te sua ntaung'n  hi  Nadus lau tana  data  ga. Tipek tu'ung liha toing  data tu'an kudut neka keta kole beo eme  toe di haeng bate kawen. Bengkes da'at naid data  tu'an.

"Ae hia kali anak dami ata jiri atan cepisa.  Ai hi Tinus danong ca wulang  kali pe'ang poli hitu ga kole ce'e gi. Taen ga wajol buta matan te lelo surak ali rasung lata mbeko. Hitu wa ga, ciwal uma  kali ga."

Dion  bate  nuk  de ende agu eman musi beo, dion kole bate  panden  hi Nadus. Kali hi Nadus ho'o bo pe'ang ga mbilimbolot cengkali sekolan. Eme bejeng kat sa'in lelo ema dosen tong  ga ka'eng kin bolo mai para tokong lelo ata  sot  lako-lako.

Leso te  can  kaut du werun ngo kuliahn da'et ngai sina salang wajol ita mbaru-mbaru sot langkas ketas pe'ang hitu. Leso te suan ga wur  le ema dosen wajol ali lat ngo bone mai kelas. Leso te telun ge, raha kole agu atay. Hitu keta kali mberes de wura agu ceki pande mohas momang  de ema dosen kudut sendo naik kelas kin hi Nadus landing  toe keta  manga  uba-uban ba wekin.  Pisa keta ngkalin hena curup  le  ema dosen ga toe keta manga hena koe  one  nai dihan.

Aben joak  de  ende agu eman musi beo ga, eta  awang  kang ketas. "Pu'ung keta sina mai lodok nang  pe'ang cicingn tana nucalale ho'o toe  keta  manga  can ata sekolah neho sekoah de anak daku." Hitu tae de eman hi Nadus agu meka sot mai lejong.

"Ai  kudu  jiri apa leng keta hi Nadus dite cepisa ta kraeng?" Rei de mekas Tomas.
"Kudu jiri pegawe mese, koen kole camat agu bupati"

Ck ck ck, ngengur agu mbogok ketas matad  de meka so'o bo ge senget  tombo de eman hi Nadus.

Rapakn ca wulang wa poli hitu ga, denge kreba lata  one  beo  kali hi Nadus agu meka werun pe'ang ga. Sua wie sua leso ema agu enden boat. Ngain pikir ritak loer lata ca beo, ngain kole pikir ringgi do sot taung wajol sekolah diha.

"Nadus, toe keta loas  toe  pas  wulang laku hau danong  ta nana. Bengkes agu tenang dami ga hau koe ata jiri di'an cepisa one mai kilo dite. Data do lalong bakok du lakon, lalong rombeng  du kolen. De hau bo nana ga lalong bakok du lakom, eko ro'engm  du kolem." Hitu retang de enden. (epifanius b jehudin/mahasiswa Prodi PGSD di STKIP Ruteng)

Editor: Kanis Jehola
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved