Ontong Batul...

“ONTONG batul e. Kalo sonde mangkali orang dong su mati samua. Ko kapal terbang tabrak sapi karmana?”
Ina Feok dudu omong sandiri waktu abis baca koran di balakang ruma. Maitua mangomel waktu loti ame itu barita bilang ada kapal terbang yang tabrak sapi.
“Ko itu sopir son ada mata ko?

Masa liat sapi yang balari di lapangan ju pi tabrak tu. Jang sampe ada mangantok. Ma kalo kurang hati-hati tu bagitu. Biar sapi ada tidor malenggang ju sopir son liat,” maitua boto-boto sama ke panta ayam.
Dengar maitua omong tasala, dia pung laki Ama Jola kaluar datang.

“Mama yang manis deng cantik, kalo yang bawa pesawat tu dia pung nama bukan sopir, ma pilot,” baptua omong sambel pegang mamtua pung rambut.
Ko su bangun dar tadi ma maitua son sisir rambut na. Makanya dia pung rambut pung taputar, son beda denga akar pohn beringin. Tapintal sana sini parsis sama ke apa ko.

“Pokonya mo pilot ko sopir ko, sama sa. Kalo pilot ju son pake mata, ya macam begini su to. Ada sapi yang balari ju baptua pi tubruk,” mamtua masi kas sala itu pilot.
Mama e, yang sala tu bukan pilot. Kalo di jalan, mangkali lu bisa rem ko barenti tahan biar sapi lewat dolo. Ma kalo di udara, son bisa bagitu. Lu mo barenti tahan dimana? Coba kalo mama ni jadi pilot, pasti sama ju deng itu orang. Makanya yang penting sakarang ni bukan pilot ada mata ko sonde, tapi orang dong yang punya sapi tu ada dimana lobang?

Ama Tobo kas sala itu orang yang punya sapi. “Artinya bagini mama. Kotong kan su tau kalo pesawat pung tampa mendarat tu conto ke di kotong pung kampong. Na, kotong  musti jaga bae-bae kotong pung sapi. Kalo mo kasi makan ya pi di tampa laen. Jang kas makan sapi di bandara. Karna bandara tu bukan kandang ato tampa kas makan sapi.”

“Ontong sa beta ni jadi tukang bajual laru. Kalo beta ni bos, beta su tembak mati itu sapi deng dia pung nene-nene dong. Ko piara sapi son pake otak na karmana? Ontong sa itu pesawat ju son talalu rusak. Kalo rusak berat karmana? Mama, sapi ni dia pung harga satu dua juta sa, ma pesawat, dia pung harga tu miliar.