Jang Pakaneok

"SUPAYA lu tau eee. Kalo mo idop sanang deng ana bini deng kaluarga, ada dia pung rahasia. Talalu gampang mo mati. Yang paling panting katong masti jaga bae-bae itu rahasia," Ba'i Ndu baomong deng Ama Tobo.

"Batul sakali kawan. Ente baomong talalu batul. Beta satuju deng ente pung pikiran. Tapi masti kastau dolu. Apa dia pung rahasia. Beta rasa dar dulu kala beta idop sond parna ada masalah deng orang. Kir-kira, apa eee, dia pung rahasia," Ama Tobo batanya Ba'i Ndu.

"Bagini kawan, tadi bet su kastau deng lu to. Rahasianya talalu gampang mo mati. Ente jang kas susah orang. Jang buat banya orang saki hati. Deng jangan lu egois. Ini tiga rahasia. Mas banya lai tapi beta kastau ini tiga sa. Nanti kalo ente su lulus deng ini tiga rahasia beta kastau rahasia yang laen lai. Tapi lu masti inga bae-bae. In rahasia bet hanya kastau deng lu. Orang laen, beta balom parna kastau. Beta kastau deng lu karna katong dua su bakawan lama. Lu masti inga bet pung pasan," Ba'i Ndu kas inga Ama Tobo.

"Ente jang kwatir. Beta pasti pagang bae-bae ini rahasia, Bet son akan kastau di orang laen. Ini tiga rahasia, bet su tangkap sadiki dia pung maksod. Beta rasa, dia pung maksud katong masti idop jujur deng jang suka putar bale deng pakaneok. Kalo katong idop hanya mo pakneok artinya katong idop sond tanang. Beta kalo idop bagini, tarus tarang sond bisa. Beta pasti galisah tarus. Bet son  tau kalo deng orang laen," Ama Tobo sambong.

"Batul kawan. Kalo ente biasa dangar o ada orang yang tidak jujur ato tukang pakaneo, dia pung rahasia orang laen dapa tau. Itu orang sond tanang, galisah mo mati deng banya stres. Kalo  su stres, ente tau to. Panyaki mulai makan dia pung badan," Ba'i Ndu balas.

"Ente parna dangar ka sonde ada satu teka teki. Itu teka teki, bilang bagini. Dibungkus bukan bungkusan, ditanam bukan tanaman. Ente tau kasonde dia pung jawaban," Ba'i Ndu tanya, Ama Tobo.

Dangar Ba'i Ndu batanya, Ama Tobo sangaja angka kapala, lia pi atas langit. Abis tu uru-uru testa. Apa eee dia pung jawaban.  Baptua sangaja tanya, padahal memang sond tau dia pung jawaban. "Beta do'o. Bet sond tahu kawan."

"Bagini kawan. Dia pung jawaban orang mati dalam peti to. Ini teka teki artinya, kalo ada orang yang simpan rahasia, mo rapi karmana ju, pasti satu saat orang pasti tau ju. Ko itu peti orang dong bungkus rapi gaga mo mati. Ma di dalam peti, ada orang mati. Na kalo ini orang mati su tanam dalam tana, lama-lama pasti bau to. Bagitu kawan dia pung arti," Ba'i Ndu jalan Ama Tobo. (reddy ngera)