Pamokol Lai
BANGON dar tampa tidor, Ama Tobo, jalan pi kamar mandi. Maso di kamar mandi, baitua langsung basiram badan. Sonde lama, baitua kaluar. Bapatua jalan capat. Tingka ke tasibuk mo mati.
Su sama ke pagawai yang su talambat mo pi kantor. Bar maso kamar tidor, sonde lama baitua su kaluar lai.
Baitua pake baju kaos putih, deng kaen merah, sonde pake sandal. Ina Feok hanya lia Ama Tobo pung tingka. Maitua sonde kas kaluar suara sadiki ju. Ma Ina Feok pung muka mangkarut tarus. Dia ke heran mo mati. Baru ini hari mas pa pagi, dia pung laki tasibu mo mati. Maitua su tanda kalo Ama Tobo, su pake baju kaos putih, deng kaen merah, pasti mo pi bajalan. Lia maitua pung muka su mangkarut, Ama Tobo malas tau.
"Lu mo muka mangkarut ko, mangkeret ko.... lu kira beta pikirin? Ama Tobo omong balogat sama ke ABG bar nae badan. Ama Tobo mulai bacari hal deng dia pung bini.
"Beta ada urusan. Lu jang halang beta. Ini urusan untuk orang banya. Untuk orang Kota Kupang samua." Ama Tobo baomomg tarus.
Sonde tahan lia Ama Tobo pung tingka, Ina Feok buka mulu. "Sapa yang batasibu deng lu. Beta sonde baomong deng lu, kanapa lu bilang bet batasibu deng lu." Ina Feok mulai dara nae.
"Lu pung muka bakarut kanapa? Lu sonde bisa lia beta pung sanang ko? Ama Tobo tanya dia pung bini.
"Terserah deng lu. Lu mo sanang, mo susa, itu lu pung urusan. Beta pung muka mo mangkarut, mo sanyum kol bungkus terserah beta to. Ko beta muka yang bagitu, lu batasibu."
Ama Tobo dangar dia pung bini baomomg, sonde kas komentar. Ama Tobo su tau, kalo basambong mulu tarus, artinya sonde bisa bajalan. "Sonde usa bakalai lai. Beta mo kastau lu. In hari beta mo bajalan kaliling Kota Kupang. Beta mo pariksa samua got di pinggir jalan. Mas ada air deng kotoran ka sonde. Kalo sampe sabantar siang beta sonde pulang, cari beta di U Ge De. Kalo sonde ada di U Ge De, Lu tau to." Ama Tobo kastau Ina Feok.
Dangar kata U Ge De, Ina Foeh, takuju. "Kalo sonde ada di U Ge De, sayang di mana?"
Ama Tobo pung hati babunga mo mati. Ko maitua pangge sayang na. Baitua tamba kas taku dia pung bini. "Kalo sond ada di U Ge De, cari beta di kamar mayat. Itu artinya beta su gem alias mati." Abis baomong, Ama Tobo langsung kaluar ruma.
Su jam dua siang, Ama Tobo balom ada di ruma. Ina Feok su galisah. Maitua dudu di bale-bale muka rumah tunggu dia pung laki. Maitua su mulai sonde tanang. Pikiran su inga kambali Ama Tobo pung baomong tadi.
"Halo sayang, beta su kambali ni. Sayang ambe aer minom dolo." Ama Tobo togor Ina Feok.
Abis minum, Ama Tobo bacarita. Talalu banya got di Kota Kupang aer dong sonde mangalir, ponu deng kotoran. Beta mo kastau bapa RT dan RW. Dong baru tarima doi dari pamarintah na.
"Beta rasa dong ju harus tau diri sadiki. Jang pamokol lai. Jang tarima abis doi, dudu pangku kaki tangan. Dong masti bajalan kaliling lingkungan. Kastau masyarakat dong, kasbarisi got. Sakarang masti kas capat barisi. Jang su maso musim hujan bar tasibu kas barisi itu got dong," Ama Tobo. (reddy ngera)
Berita Terkait
![[FULL] Meski Koordinator Aksi Damai & Demo Jilid II Batal, Pakar: Sulit Warga Maafkan Bupati Pati](https://img.youtube.com/vi/0qdqol4f7aU/mqdefault.jpg)
