Tapaleuk : Bai Ndu Dapa Abate dari Petugas
abis dia kaluar ko kastao bilang itu bubuk abate untuk kasi mati nyamok dong.
Penulis: Oby Lewanmeru | Editor: Rosalina Woso
lihat foto
Tapaleuk : Bai Ndu Dapa Abate dari Petugas
POS-KUPANG.COM--Ina Feok bangun amper siang karna dia musti bamasak kasi dia pung laki. Balom lai dia musti pi jual ikan di pinggir jalan sana yang dia su pesan tadi malam.
"Ama bangun su te beta su mo pi bajual. Kalo bangun na liat makan ko makan, beta ada buru-buru supaya ini ikan dong bisa laku," Ina Feok langsung jalan karna takut sadiki lai su hujan.
Tobo bangun dia langsung makan karna dia tadi malam sonde makan.
"Ama kanapa lu baru bangun, biasa jam bagini lu su jalan. Lu ada sakit ko," Bai Ndu su togor Ama Tobo.
"Sonde ama, beta ada pikiran te sakarang katong ada tugas talalu banya. Apalai sakarang musim hujan," Ama Tobo maso di dapur ko buat kopi kasi dia deng Bai Ndu.
Dong dua ada bacarita te Ina Feok su pulang basa-basa.
• Peringati Hari Gizi Nasional dengan Bazaar, Pameran Olahan Pangan Lokal dan Konseling Gizi
• Bupati Timor Tengah Utara Raymundus Fernandes Imbau Pelaku Pasar Perhatikan Kebersihan
"Ina, ini hari pulang sedu e,ikan mungkin cepat laku o," Bai Ndu sengaja togor dahulu.
Ina Feok yang su tao, sangaja diam ko langsung masok simpan keranjang di dalam.
"Ama, sakarang ini ikan mahal, jadi orang banya yang cari ikan pagi soalnya ikan susah na," Ama Tobo yang jawab Bai Ndu.
Ina Feok yang su tukar pakaian ko sonde barenti capek lai te su dudu deka Tobo.
"Ama ko tadi bilang mo jalan na kanapa balom jalan ju," Ina Feok tanya di Tobo.
Bai Ndu yang ada su perasaan, jang sampe Ina Feok bilang gara-gara dia datang ko Tobo son jadi jalan.
"Ama lu mo pi mana na kenapa son kastao dari tadi supaya katong jang bacarita lai," Bai Ndu omong pelan-pelan.
"Ama lu tao ko sonde, sakarang ini ada musim ujan ko ada banyak nyamok. Mulai kemarin Katong deng petugas ada bajalan bagi itu bubuk yang sama ke bibit roti itu," Ama Tobo sonde tao abate.
