Kuliner Khas NTT Inga Kangkung Oeba, Mix Parkadel Tahu, Jaoh di Mata Dekat di Hati Inga Kota Kupang

POS-KUPANG.COM - Menu kuliner khas ntt kali ini kitong mau coba makanan dan sayur orang Kupang hari hari.

Bagi orang Kupang yang ada di Kupang dan orang Kupang yang ada di rantau pasti tau ini sayur hari hari.

Ini sayur biar mo kaya ato miskin pasti jadi salah satu sayur andalan warga Kupang.

Sayur kakung tumis dan sayur putih ato sayur sawi.

Kali ini beta mo ulas sadiki enaknya sayur kangkung yang jadi makanan andalan kuliner ntt.

Bagi basong anak anak Kupang yang ada di rantau na jang lupa deng sayur kangkung timus eee...

Biar su bos dan su jadi orang kaya di tana ranto, su jadi kapala dinas, su jadi pengusaha, su jadi dokter, su jadi dosen.... tapi inga ini sayur kangkung eeee.

Ini sayur kangkung yang jadi andalan kiotng pung orang tua saat kitong masih kici sampe kiong su tua kalo masih tingga di Kupang.

Kitong pasti inga kitong pung mama bapa yang kasih besar kitong deng ini sayur yang jadi kebanggaan kitong samua.... apalai yang sakarang su kapala lima pulan dan su mo pansiun.

Pasti inga masa kici saat masih di Kupang suka makan sayor Kangkung oeba.

Ini kangkung Oeba nih... dulu jadi andalan kitong samua waktu masih kici di Kupang.

Kitong kalo pi Pasar Kampung Solor, pasti kitong pung mama bapa beli ame ini sayur kangkung.

Kitong pung bapa mama pasti beli ame ini sayur kangkung pulang ko tumis kasi kitong makan.

Ini sayur ju yang ikut topang kitong pung gizi dalam keluarga sampe kitong besar... selain ikang tembang.

Ikan tembang ju jadi andalan kitong pung bapa ma mama waktu kitong masi kici.

Bapa deng mama kalo pi pasar pati pulang beli ikan tembang yang paleng mura meriah.

Goreng garing ko kasi makan kitong. Kalo ikan tembang lagi murah, satu ember jual cum Rp 100 rupiah.

Kitong pung bapa mulai belah ko jemur di atas seng ko bikin ikan kering.

Nanti kalo su makan kosng, kitong pung bapa ame ko goreng  garing makan deng bubur panas panas.

Ato beli ikan sardin jemur ame ko goreng garing kasi kitong maka deng bur waktu kitong masih kici di Kupang.

Jadi sakarang kitong pasti ana Kupang yang ada di rantau pasti sonde akan lupa deng sayur kangkung.

Menu kuliner ntt kali ini beta cuma mau suguhkan kakung tumis deng tahu parkadel.

Kalo untuk kangkung tumis sonde usah beta bahas laiiii di pung bumbu karena sudah kitong bahas ulang aling.

Juga parkadel tahu beta sonde bahas lai kali ini karna su sering bahas cara bikin parkadel.

Tapi kali ini cuma bahannya dari tahu bukan pake parkadel kentang.

Selamat menikmati berkat Tuhan kangkung tumis mix parkadel tahu Kupang ala Ferry Ndoen, Selasa 28 Februari 2023 GBU (fen).

Ikuti Pos-Kupang.Com di GOOGLE NEWS