Tapaleuk, Musim Bausul

Tapaleuk, Musim Bausul

POS-KUPANG.COM, KUPANG - Ama Tobo deng Bai Ndu papagi bakatumu di cabang ko dong dua mau pu kantor Lurah iko musrenbang tingkat kelurahan. Dong dua stel rapih deng celana jeans yang dong beli kemarin sore di pasar deng kaos oblong.

"Ama kira-kira yang kemarin katong bahas di tingkat ErWe tu gol ko sonde ee sebentar, katong dua mus pertahankan oo," Ama Tobo kastegas sang Bai Ndu ko sabantar bamulu minyak.

Dong su yakin pasti lolos, karena di tingkat ErWe dong usul soal jalan balubang yang su makan taon ma son tau parbaiki.

Baca juga: Tapaleuk, Sonde Nodek

Padahal itu jalan batoki testa deng satu anggota dewan pung pagar tembok, tambah le itu jalan ju semua pejabat penting lewat tiap hari.

"Neo sabantar baru katong baliat, dong berani son kaslolos itu jalan beta tutup na, apa lae hujan bagini su ke kolam susu sa, aer putih semua," Bai Ndu ju su mulai emosi.

"Neo jang kastunjuk urat di beta, sabantar di kantor Lurah sa. Disini parcuma hanya beta yang liat," Ama Tobo manyaot.

Akhirnya dong dua iko rapat, habis rapat ju dong dua muka senyum-senyum ke baru habis dapat kokis solo.

"Akhirnya katong pung usulan jadi prioritas, ma beta ragu ee tau dong kaslanjut sonde pi cekamatan sampe kota, jang sampe hanya batas di kelurahan sa na katong kuah kosong," Ama Tobo omong puas ma ke masih ragu.

"Hanya dong deng Tuhan sa yang tau, kalo dong mau perhatikan katong masyarakat susah pasti ada jalan," Bai Ndu sambung sang Ama Tobo.

Baca juga: Tapaleuk, Awas Curanmor

Habis itu dong langsung pulang rumah te poro su karongcong gara-gara hanya dapat kokis donat satu deng akua gelas sa.(Ryan Tapehen) 

Ikuti Berita POS-KUPANG.COM Lainnya di GOOGLE NEWS