Tapaleuk,Katong Sama-Sama Atasi Masalah Stunting

POS-KUPANG.COM, KUPANG - Su Masok tahon baru ni, Ama Tobo son suka minum mabok lai. Padahal Baptua biasanya minum mabok sampe mati setengah di pangkalan ojek.

Apalai kalau Tobo pi di dia pung bestie Ba,i Ndu pasti minum mabok sampe taroso taroso di tanah.

Tobo yang sekarang ju su bartobat ko rajin gereja dapa puji dari dia pung bini Ina Feok.

"Beta pung laki ni sakarang tamba babatu sa. Son minum mabok, tamba lai rajin pi gereja," Ina Feok puji dia pung laki saat dong dudu bacarita di depan rumah.

Baca juga: Tapaleuk, Sonde Nodek

Ina Feok yang su son pusing deng dia pung laki lai, berharap semoga dia pung laki ada pikiran untuk tabung sadiki-sadiki dari hasil ojek bantu di gereja.

"Tobo sayang e, coba uang ojek lebi yang lu dapa tu kasi di gereja bae, supaya lu oung dosa dong bisa diampuni," Ina Feok kasi inga dia pung laki.

Tobo dalam hati dengar Ina Feok pung permintaan ju berpikir untuk mau buat begitu. Tobo ju langsung sambung Ina Feok kalau ada dengar orang-orang dong bacarita di Gereja ada bangun Posyandu Stunting.

"Kemarin beta dengar teman-teman dong ada bacarita kalau di gereja Gmit Efata Liliba ada bangun posyandu stunting. Beta mau buat bae deng kasih uang yang beta tabung, sapa pi tau bisa bantu ana-ana stunting dong lewat gereja," Tobo omong di dia pung bini sambil masok lia dia pung tabungan.

Ina Feok yang dengar dia pung laki pung niat bae ju langsung puas memang. 

Baca juga: Tapaleuk, Awas Curanmor

"Beta tamba sayang sa, semoga katong pung niat bae ni bisa motivasi orang laen ju untuk bantu orang laen, terutama ana-ana stunting dong. Sekaligus bersama-sama deng pemerintah atasi stunting di Kota Kupang," Ina Feok omong langsung palok dia pung laki. (Ray Rebon).

Ikuti Berita POS-KUPANG.COM Lainnya di GOOGLE NEWS