Tapaleuk, Angin Ta Duduk

Tapaleuk, Angin Duduk

POS-KUPANG.COM, KUPANG - Tadi malam Ama Tobo tartau bajalan pimana ko papagi buta su mengeluh perut tatikam.

"Ado mama ee beta pung perut tatikam ke ana panah cinta ada natok di ulu hati ni, bisa kas sembuh ko mama," mengeluh sakit ma Ama Tobo masih sempat maen gila deng dia pung maitua Ina Feok.

"Ko tatikam karmana bapa, jang sampe maag ini, ma beta rasa bapa sonde pernah sakit maag. Jang sampe bapa kena levi. Begitu na beta pi cari orang ko sumbur sa ko," Ina Feok ju jawab serius.

Baca juga: Tapaleuk, Tarima Penghargaan 

Dengar dia pung maitua pung perhatian ju Ama Tobo tambah babikin lae. Dia su mukai batareak ke mo mati sa. Mamtua su mulai kalang kabut, pikiran mau pi Bai Ndu ju hilang bagitu sa.

"Cepat su mama pi Bai Ndu. Dia yang biasa sumbur kalo sakit-sakit bagini," Ama Tobo ju kasmanapa dia pung bini.

"Selamat pagi Ama Tobo deng maitua, kanapa ni ke beta dengar pung baribut ame lae, angin-angin bagini jang terlalu baribut nanti angin tambah foe," Bai Ndu tartau dari mama kaget sa su di muka pintu.

Ama Tobo Deng Ina Feok baliat ju langsung sama-sama kaget. "Aduh Bai Ndu dar mana beta pas mo pi rumah ini, beta pung laki perut tatikam," Ina Feok lansung jelaskan.

"Ohh beta liat ini ciri-ciri ke angin ta duduk, mus sumbur, ma obat ada di hutan, kalo cari harus tunggu bulan purnama, Ama Tobo tahan sa, ma sonde boleh pi rumah sakit ee. Jang suntik nanti Ama Tobo bisa ketemu Bapa Besar di atas," Bai Ndu pesan ju lansung jalan.

Dong dua laki bini baliat sa,. Dar tadi dong msen gila ma ini kali Bqi Ndu main gila balik dong dua stenga hek. Ini dong sonde tau kapan purnama, suru jang pi rumah sakit lai, jangan-jangan belum purnama Ama Tobo su menghadap Bapa Besar.(Ryan Tapehen)
 

Ikuti Berita POS-KUPANG.COM Lainnya di GOOGLE NEWS