Tapaleuk, Banyak Soal

POS-KUPANG.COM, KUPANG - "Awi papa boi mau pimana ni pagi-pagi, ke talalu ganteng mo mati ini pagi, jang sampe tadi malam tidor mimpi tasala apa ko," Ina Feok menyanyi pagi-pagi liat dia pung laki Ama Tobo su stel rapih deng jam 7 pagi.

"Ina sabar he di rumah, bapa mau pi cari soal di kecamatan dolo, ini dong tip hari tetangga sebelah kusu-kusu omong ini stunting yang sonde tau dia pung ujung pohon," baptua manyaot ko kodo kopi deng isap roko 1 batang.

Ama Tobo ini hari rencana pi bikin soal di kecamatan, pas ada rapat deng otang dari dinas kesehatan deng tartaubitu tim percepatan yang kerja ju dia sonde tau dong kerja apa.

Baca juga: Kota Kupang Kini Punya Dua Kampung Kerukunan

Sampe kecamatan rapat balom mulai. Pas mau duduk dapa lia Bai Ndu ada sandar di bunga terompet dekat sudut kantor camat.

"Hoi baitua iko rapat ju ko, katong dua sebentar bikin soal kasi itu pejabat sedikit dolo, sekarang ke semua katong pung hidop serba salah," Ama Tobo su mulai feo bawa Bai Ndu.

"Masalah apa lae. Lu tiap hari hidop ponu masalah sa," Bai Ndu tanya bale.

"Bagini ama, katong ni katong dar lahir pendek ma katong rajin kerja sehat-sehat sa dong bilang masalah, pas katong tinggi besar ma pamalas bagarak itu pejabat dong bilang masalah, sekarang su masuk anak-anak lae ju kena masalah bilang stunting tinggi kurang, berat kurang, semua kurang padahal beta rasa cukup ma. Adoh Tuhan e hidop ke pung banyak masalah lae," Ama Tobo su omong panjang lebar.

Bai Ndu ju dengar sa, "Mending sebentar lu dengar babae itu pejabat besar dong omong ko pulang lu bisa selesaikan lu pung masalah, tapi kalo lu omong lu pendek itu lu mau selesaikan gaya apa ju sonde akan bisa ada jalan keluar," Bai Ndu omong habis lansung jalan masuk takuut kena sambar.(Ryan Tapehen)

Ikuti Berita POS-KUPANG.COM Lainnya di GOOGLE NEWS