Tagal Doi Parkir

Tagal Doi Parkir

MULAI  ada tempat-tempat belanja ‎di Kota Kupang, banyak juga muncul jaga parkir. Kebetulan Ama Tobo ju selama ini ada jaga parkir di satu sualayan. 

Ini hari tao kanapa ko Tobo balom pi jaga parkir ju. Ina Feok su kasbangun ma baptua tidor tarus. 

"Woe ama lu tadi malam buat apa ko matahari su di atas kapala ju lu balom bangun," Ina Feok batareak kuat-kuat.

Tao kanapa ko Ama Tobo ada sadar ma ko dia balom mo turun dar tampa tidor.  Pas Ina Feok mo pi kas bangun te takuju Bai Ndu ada togor di muka rumah, jadi Ina Feok suru dia masok.

"Ama masok ko duduk dolo,Tobo ju balom bangun ini," Ina Feok ada siap kopi kasi Tobo supaya bangun na langsung minum.

Karna pas ada Bai Ndu, Ina Feok langsung buat kopi dua gelas.

"Ina beta kemarin ada baca koran itu bilang sakarang yang jaga parkir harus iko aturan, jadi musti ada karcis," Tobo baru bangun ma langsung sambung.

"Adoh ko kenapa bagitu ama, jang sampe Tobo pung bos ju dapa masalah ko,"Ina mulai bacarita‎ deng Bai Ndu. 

"Itu su,salama ini Tobo jaga parkir dia iko aturan,dia pake rompi, tanda pengenal ju ada pentungan yang biasa malam menyala tu. Mungkin dong pung bos yang son setor ke pemerentah, " Ina jalan pi dapur lai.

Ama Tobo yang dengar, dia sengaja bergerak ko tiba-tiba bangun pi ame kopi ko masko.

"Begini ama, be mo kastao e, katong petugas parkir itu su banyak yang terdata jelas, iko atoran. Hanya ada yang sonde iko atoran,baru dong bukan petugas yang sebenarnya," Tobo cerita di Bai Ndu.

"Ama lebe bae mulai besok ‎, iko itu aturan sa. Kastao kawan dong ko pake rompi, pegang karcis, supaya orang son ragu lalu tanya katong, "Bai Ndu sama ke mo nasehat Ama Tobo.

"Itu su,jang sampe karna katong-katong pung cara lalu pejabat dong kena barenti lai na karmana su," Ina Feok pi kasi semangat Tobo supaya tetap jaga parkir. 

Bai Ndu ju sambung ko suru Tobo tetap jaga parkir sa, sakarang ada atoran jadi kalo katong terdaftar itu aman. 

"Bosong ju musti barani omong bos supaya setor itu uang bae-bae ko jang bikin masalah lai," Bai Ndu bangun ko cari tambako mo makan. (oby lewanmeru)