Tapaleuk: Mau Kas Taku Sapa O

POS-KUPANG.COM, KUPANG - Ina Feok pung sifat son berubah dari dolo.

Dia kalo mo apa harus langsung ada. Andia ko dia di rumah tiap harus bikin Ama Tobo sengsara.

Hamper tiap hari dia mangomel dia pung laki. Tapi tao kanapa ko ini hari dia diam-diam sa.

Tobo sakarang masih aktif di kantor, jadi dia sibuk. Padahal dia su umur mo pensiun.

"Ama lu itu hari beta su bilang ko lu minta pension dini lu son mao. Sakarang lu rasa su te ada rame mo mutasi, lu rasa diri su jang sampe lu pung nama ju ada," Ina Feok omong dia pung laki.

Baca juga: DPRD Sumba Timur Gelar RDP dengan Pemerintah Daerah 

Ama Tobo yang ada dudu di muka rumah bangun ko jalan pi belakang karna ada tetangga dong ju ada muncul di situ. Dia ini hari libur jadi son maso kantor.

"Ina bakalae deng sapa, su kanapa ko pagi-pagi si baribut ini," Bai Ndu su datang di Tobo dong pung rumah.

"Ama e, beta bukan bakalae te beta ada omong lu pung sodara ni te dia ada firasat son enak, jang sampe dia mo diganti," Ina Feok kastao Bai Ndu.

"Nah ko ‎baitua blom pension ju ko. Baitua ni mungkin orang kepercayaannya bos ko," Bai Ndu omong bisik-bisik ke Ina Feok.

Baca juga: Pengamat Kebijakan Publik NTT: Harus Benahi

"Balom pensiun, andia ko beta ‎ada omong ini ko dia berenti su. Soalnya ada mo mutasi ini, hanya pejabat dong omong tarus ma balom mutasi ju," Ina Feok omong kuat-kuat.

Ama Tobo yang dengar dia diam-diam sa soalnya taon lalu dia pung bini suru pensiun dia son mao na.

"Beta su mofak bagini, beta son pusing, kecuali itu hari beta ada minta ini jabatan na neu. Jadi kalo mo mutasi na mutasi su ko jang bikin katong bingung," Ama Tobo tensi agak nae.

"Batul su ama, memang beta ju dengar bilang ada mo mutasi ma takuju tunda lai. Tao ini pejabat dong mo kastaku sapa," Bai Ndu omong ko abis dia su pamit pulang. (oby lewanmeru)