Tapaleuk: Ini Baru Batul

Tapaleuk: Ini Baru Batul

POS-KUPANG,KUPANG - Ama Tobo pung hape su mau amper satu bulan ni rusak gargara calaka pas bale pancing ikan. Padahal baptua ada iko mati satu kasus pembunuhan ibu deng anak yang viral.

Baptua bingung mau car tau ini kelanjutan barita darmana, tivi di baptua pung rumah ju ada koslet.

Gargara sonde tahan lai, baptua lari pi eltari ko beli ame koran pos kupang. Bale sampe rumah baptua langsung parenta Ina Feok.

"Ina cinta badara buat ame kasi be kopi satu dolo, beta mau dudu sante ko baca koran ni, " baptua parenta sambel dudu pangku kaki di teras muka.

Baca juga: Jelang Kedatangan Jokowi Pasar Mbongawani Ende Ditertibkan

Ina Feok ju tumben sonde banyak basambung baptua lai, mamtua langsung angka galas ko putar kas dia pung laki kopi panas.

Ina Feok buat kopi angin ribut, sonde sampe 5 menit kopi su jadi. Pas antar pi teras Ama Tobo heran stenga mati, karna mamtua sonde ke biasa.

"Wih tumben lu sond ada mangomel-mangomel, biasa be suruh bagini lu su langsung gas na, " Ama Tobo parhatikan babae mamtua pung muka.

Kopi su jadi, sonde pake lama lai Ama Tobo langsung buka koran ko maloi halaman partama.
Baru baca judul sa baptua su malompa ko itu kopi dong tumpa buang samua.

Baca juga: Kesbangpol Sikka Gandeng SMK St. Thomas Maumere Gelar Lomba Pidato, Libatkan 25 SLTP di Sikka

"Haa ini dolo pangadilan musti tagas bagini, ini baru batul, sonde mungkin itu laki-laki bunuh sandiri be su yakin na, " baptua sonde pusing lai deng itu kopi yang lante su minum.

Dengar baptua batareak, Ina Feok yang ada tasibuk deng batumis sayur langsung lari pi muka. "Lu kanapa ni, su ke orang mabok sa, lu lia sonde itu kopi dong su tumpa buang, " mamtua hanya geleng kapala sa.

"Adoh cinta badara e, be talalu sanang ini kasus pambunuhan ibu dan anak ni dia pung tersangka su dua a, pangadilan dong su tolak manta manta itu parampuan pung praperadilan na, ini baru batul negara harus adil bagini, " dengar Ama Tobo yang omong tal banya, Ina Feok cium babo angus, tarnyata mamtua pung sayur su angus (Berto Kalu)