Tapaleuk

Su Pasti Ini Taon Kelaparan

Ma ini taon, pucuk labu sa sonde ada. Apalai dia pung bunga. Jagong su babunga, langsung karing kembali.

ILUSTRASI/POS KUPANG
Tapaleuk Pos Kupang 

AMA Tobo kakodong stenga mati. Antara panas dan ujan, cuaca sonde jelas. Mau bajalan, awan datang itam marege. Biasa bagitu, ujan poa datang, besar ke biji jagung. Ma ini kali sonde. Awan itam sa, sonde lama matahari su kaluar lai.

"Ini taon kitong ancor. Aer sonde ada. Kermana ko jagong dong mau jadi. Sawah sa balom bisa kerja. Ko ujan sonde batul bagini ni. Co mau ujan na ujan to. Ini su musim ju, ujan datang ke pake malu-malu."

Ama Tobo mangomel sandiri. Ina Feok diam sa. Biasa tiap taon bagini, maitua pung kobong sayor ponu. Tenga pi keto, su bisa makan deng bajual di pasar. Ma ini taon, pucuk labu sa sonde ada. Apalai dia pung bunga. Jagong su babunga, langsung karing kembali.

"Ini taon kitong musti kerja keras. Ama musti pikir kerja apa ko apa, supaya bisa makan minum. Harap sawah deng kobong, kitong mati kelaparan nanti."

Ama Tobo diam. Su tua bagini, musti kerja keras, pinggang deng lutut su sonde kuat lai. Badiri sadikit, su ba asam. Musti gosok minyak Nona Mas baru bae lai. Andia ko baitua kakodok stenga mati.

"Ina e. Kitong ni sonde apa-apa. Yang penting rajin sa, makan minum sonde jadi soal. Ma basodara dong yang idop tagantong di sawa deng kobong ni, berat. Pamarenta mus dari sekarang pikir memang. Su pasti ini taon kelaparan." **

Penulis: Sipri Seko
Editor: Sipri Seko
Ikuti kami di
KOMENTAR

BERITA TERKINI

© 2020 TRIBUNnews.com Network,a subsidiary of KG Media.
All Right Reserved