Tapaleuk

Son Taku Malam Lai

Ama Tobo heran. Ina Feok ke pintar sekali. Bukan pintar baomong sa. Tapi maitua palok Ama Tobo sampe semua tatempel abis.

SONDE tau su foe apa ko, Ama Tobo ajak dia pung maitua, Ina Feok taputar malam-malam deng motor. Dong dua jalan sonde ada tujuan, hanya kaliling-kaliling sa.

Sepanjang jalan, Ina Feok rasa ke ada yang laen. Su tenga malam ma masih talalu rame. Orang masih duduk-duduk di mana-mana. Di Bundaran PU, manusia tapoa. Duduk kaliling ko bacarita. Ada yang makan mie rebus, ada dudu minum kopi, ada ju yang hanya dudu dudu sa.

"Ini dolo baru kota. Dolo kitong mau bajalan malam takut. Su gelap lai, orang bapajak di mana- mana. Sakarang na lu bapajak su. Te manusia ada tapoa di jalan. Tasala lu yang kana habok."

Ama Tobo diam sa. Baitua jaga stir bae-bae. Tasalah belok, dong dua bisa UGD. Soalnya Ina Feok ni batu ju na. Maitua kadang sampe bok, Ama Tobo belom belok, dia su miring na. Andia ko Ama Tobo mus hati-hati.

"Di jalan, sakarang orang bajual makan di mana-mana. Kalo dolo hanya nasi goreng deng ayam lalapan, sakarang RW deng nabas yang kuasai. Asap nae di jalan. Dong bakar daging manta ko orang langsung makan. Ma itu bae ko sonde e."

Ina Feok mandadoto tarus. "Beta rasa pemerintah musti turun. Cek dolo. Itu makanan dong sehat ko sonde. Ada ijin dinas kesehatan ko sonde. Memang kitong mau cari makan tenga malam su sonde susah lai, tapi kalo makan abis penyakit, lebe bae jangan."

Ama Tobo heran. Ina Feok ke pintar sekali. Bukan pintar baomong sa. Tapi maitua palok Ama Tobo sampe semua tatempel abis. **

Penulis: Sipri Seko
Editor: Sipri Seko
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved