Jang Kasi Kendor

POS-KUPANG.COM - Ama Tobo sakarang sibuk urus kebon, apalai sakarang hujan su turun tarus. Dia tiap hari maso kebon pagi pulang malam, andia ko dia sonde pernah nonton tivi lai.

"Ina bosong di rumah sakarang ada dapat nonton barita apa sa te beta su mo stu minggu son maloi sadiki itu tivi," Ama Tobo tanya dia pung bini.

Ina Feok balom jawab te Bai Ndu su muncul ko pukul Tobo pung balakang.

"Ama e,lu satu minggu lebih ni lu di mana ko beta son dapa liat. Beta kira lu ada pi tugas luar daerah," Bai Ndu tanya Tobo.

"Ama lu sama ke son tao sa, kalo su musim ujan bagini pasti beta harus di kebun, Ama Tobo jelaskan di Bai Ndu.

Ina Feok yang dengar dia hanya bikin mata melotot sa.
Padahal, Bai Ndu ada tao ma sangaja tanya lai di Tobo.

"Beta hanya maen gila sa, ko abis beta sonde dapa liat lu na. Su dua hari beta pi ?duduk di pak laru sandiri ko lu sonde ada na andia ko beta tanya," Bai Ndu pi duduk dekat Tobo.

Dong dua duduk bacarita soal ujan deng kebun, ma tiba-tiba Bai Ndu mulai carita soal rencana pemerentah NTT mo kelola itu komodo.

"Lu dengar ko sonde bilang gubernur su minta di pemerenta pusat ko mo urus itu kebun komodo ko apa," Bai Ndu sonde tao taman nasional komodo jadi dia bilang kebun.

Ama Tobo dengar hanya senyum sa karena dia takut Bai Ndu tersinggung.

"Ama itu komodo itu binatang, dia pung tempat tu nama Taman nasional komodo bukan kebun. Lu kalo omonh bagini orang laen dengar pasti ketawa," Ama Tobo kastau Bai Ndu.

Ina Feok dari dapur sana dia langsung lari ke muka ko, dia bilang jang ada-ada te beta kemarin ju ada dengar orang di pengadilan dong carita bagutu tu.

Ina Feok sengaja singgung soal pengadilan karena dia ada pi nonton tetangga yang ada kasus andia ko sidang kemarin.

"Kalo begitu, beta jua setuju, karena biar ko katong pu pemerenta dong ame alih ko urus te salama ini uang mungkin banya ke pusat," Bai Ndu langsung bangun ko minta tembako di Tobo.

Ama Tobo ju angguk-angguk sa., "Kalo mo urus itu komodo pokok harus siap semua? dan jang kasi kendor te salama ini katong son tao mungkin ada yang maso pancuri di sana ko apa ko," Tobo sorong tembako di Bai Ndu.(Oby Lewanmeru)

* Tapaleuk adalah rubrik khas Pos Kupang edisi cetak yang hadir sejak awal terbit tahun 1992. Isinya secuil esai ringan mengenai aneka fenomena sosial yang dikemas dalam bahasa Kupang

* Rubrik tapaleuk Pos Kupang hadir setiap hari Senin sampai Sabtu ditulis para wartawan Pos Kupang