Awas Musim Angin Muson

Laporan Wartawan Pos Kupang.Com, Ferry Ndoen

BAI Ndu dudu lalolik di tana sambil mama siri. Dia muka agak tegang baca ame korang Pos Kupang, koran kesayangan masarakat eN Te Te kalo skarang ada siklon muson yang melanda termasok wilayah eN Te Te.

"Bet dengar ada kecelakaan parahu motor di perairan di Wekelo di Sumba Barat Daya, Pulau Sumba. Memang skarang nihhh... angin pung kincang laiiii...nelayan dan paruhu motor musti hati hati... karna angin kadang suka foeee kaget.. bisa bekin parahu tabalek dan bisa tanggalam," kat Bai Ndu.

Ina Feok... ju mangaku kalo dia ju su ba ame itu barita di koran.. Bet dengar ada ampat orang yang masih ilang dan masi dicari tim SAR.

"Itu... su kadang kalo balayar deng parahu kici bekin atong pung hati jadi deg degan sa... Kadang waktu kaluar dari dermaga... sonde ada angin... tapi tiba tiba angin kancang bikin panumpang pucat.. Bet lebe suka naek kapal besr... sperti kapal Awu ato paleng minim nake kapal feri. Kapal feri kalo angin foee... dia barenti barlayar dan bertedu di darmaga paleng dekat ato di sekitar pulo yang peleng deka...," kata Ina Feok.

Ina Feok mengaku kalo mo pulang ke Sabu.... dia lebe suka naek kapal feri..... kalo naek perahu... biar su.. Lebe bae bet naek pesawat sat kali biar agak mahal tapi aman.

Bai Ndu ju batamba... "Tapi itu tiket kapal pi sabu amper sama mahal bahkan lebe mahal ke pi Jakarta," kata Bai Ndu.
Dong dua asyik baomong... so rasa ma ini kue pisang sat piring su ludesss....

"Lu baomong tapi it tangan ju tarus maeen.. raba itu kue pisang. Bet baru maka dua potong lu su ses ampat potong.. Kopi ju su kittt... deng ampas kopi," kata Ina Feok baganggu. (ferry ndoen).