Wisatawan Mati di Hotel

Laporan wartawan Pos Kupang.Com, Ferry Ndoen

BAI Ndu takuju baca ame di koran kalo ada wisatan dari Jakarta yang mati di sala satu hotel Ende. "Kasian... ee.. akibat keteledoran sampe berakibat fatal... Ini yang bekin katong mau pi nginap dan mandi hotel su jadi takut lai.. abis kalo sala mandi bisa mati kana stroomm," kata Bai Ndu.

Ina Feok jua keliatan sedi..."Beta ju baca ame di koran kow beta ikot sadiiih... bet bayangkan bagaimana dia pung pacar dengar dia pung nona baterak minta tolong... tapi dia mau pi tolong te ternyata ikot mati," kata Ina Feok.

Bai Ndu pukul dia pung testa..Ini ju yang bet baca ame kora dan liat di facebook bet jadi sadiih.

"Ya... polisi harus cari tau dan usut kanapa sampe bisa kejadian saparti itu.. Karna bet baca sapintas... itu nona ada luka bakar di beberap bagan tubu.. Kalo ada luka bakar... kemungkinan ato diduga dia kena strooom di kamar mandi saat dia mandi...Dan diduga ju... dia pung pacar mau datang tolong dia pung nona yang bateriak ju... kemungkinan ikot kana strooom ko dong dua merenggang nyawa," kata Bai Ndu.

Bai Ndu dan Ina Feok tarus babahas itu persoalan sambil dong minum kopi panas di teras ruma.. ini yang bekin suasana tamba panas.

"Bet son bisa bisa bayangkan kalo itu kana katong pung diri...maksud hati mau sanang-sanang tapi tarnyata kematian yang datang menjemput... Ini yang bet inga ame di kita suci Alkitab bilang bagini.... kalo kematian tuh datang sperti pancuri di malam hari.... dan hidp manusia tu... sperti uap air... yang akan menguap dan berlalu." kata Bai Ndu.
Ina Feok yang dengar ame Bai Ndu pung baomong dia jadi katawa....

"Lu katong baomong soal kasus kematian mahasiswa di kamar mandi hotel... tapi lu pi sambung deng bahasa kita suci.. Tapi bet akui lu... wow.. ini berarti lu sangat paham deng ajaran agama," kata Ina Feok. (ferry ndoen)