Investasi bodong di NTT

Laporan Wartawan Pos Kupang.Com, Ferry Ndoen

SAKARANG ni banya orang yang mau kaya sacara instan ato kapingin capat kaya tanpa mau karja karas. Ini yang bekin orang yang capat mau kaya ini suka kana tipu.

Bai Ndu sambil kas naek kaki di teras ruma.... di mulai angka bicara.

"Bet.... baca ame di katong pung korang Pos Kupang, koran kebanggaan masarakat eN Te Te,.... kalo masarakat su kana kokoe deng tawaran deng janji yang manis kow kalo kasi modal doi yang banyak deng harapan nanti bisa dapa doii,...berkali lipat," kat Bai Ndu.

Bai Ndu ju secara polos mangaku jujur kalo dia ju su parna kana tipu deng model yang sama..... sekitar sapulu taon lalu... Ada pegawe di Dinas Pertanian di paropinsi yang su mau pansiun.... tapi dia tipu ame banyak masarakat dengan janji yang sama unyuk capat kaya dan janji yang muluk muluk... kalo tanam uang skian nanti akan dapa berkali lipat.

"Bet masi inga... beberapa masarakat yang pi taro uang yang awal awal.... ato yang taro uang yang partama... mereka masi bisa dapat uang... Ini yang beki carita dari mulu ke mulu.... kalo ini invetasi tuh... banar dan menguntungkan... akirny, beta pada waktu itu pi kasi ame doi Rp 5 juta... tarnya bet pung
doiii...naoooo... abis itu pegawe di Dinas Pertania... bet dengar dia su kabur lari ilang pi Papua kow su mau pensiun... andia kow bet pung uang Rp 5 juta ilang alias naooo...

Ada banyak masarakat laen ju yang kana tipu yang sama ke beta pada waktu itu. Kejadiannya sakitar sapulu taon lalu," carita Bai Ndu.

Ina Feok yang dengar Bai Ndu pung carita dia cum katawa sambil pegang parut...

"Andi lu pung ngali goa deng lu pung bodo... kanapa kow pi parcaya invetasi sperti itu... Coba pikir deng akal sehat... Orang yang barmain di saham sa di pung bunga ju son sampe bagitu besar," kata Ina Feok.

Bai Ndu cum katawa...." Itu su... bet pung ngali naa...andia ko pi parcaya ame kawan dong pung carita andia kow beta jato dalam godaan... beta tergiur karna kapingin capat kaya," kata Bai Ndu.
Bai Ndu sakrang kambali inga ame ini carita soal investasi bodong yang parna dia alami dan sakarang lagi rame terjadi di masarakat karna banya masarakat yang kana tipu. (ferry ndoen)

* Tapaleuk adalah rubrik khas Pos Kupang edisi cetak yang hadir sejak awal terbit tahun 1992. Isinya secuil esai ringan mengenai aneka fenomena sosial yang dikemas dalam bahasa Kupang

* Rubrik ini hadir setiap hari Senin sampai Sabtu ditulis para wartawan Pos Kupang