Tombo tombo

Nuk Hindi Haes Anak

Toe kole metek nggere one ended Pondik holes kole rangan nggere one tembok. Nggitu terus kaut panden wie hitu cangga hus nai mese.

POS KUPANG.COM, KUPANG -  WIE hitu emad Pondik hole hales toe nganceng toko. Toe metek nggere one tembok rangan holes kole nggere one ranga de ended Pondik. Toe kole metek nggere one ended Pondik holes kole rangan nggere one tembok. Nggitu terus kaut panden wie hitu cangga hus nai mese. Toe doing liha ga cekerehang kole gi tana.

Lorong hitu kole ended Pondik cupu mai racap toe nganceng toko lemot. Ali huwi hawis terus kaut wulin hi emad Pondik wie hitu. Toe kole manga toi le run emad Pondik co'o keta campitn tara toe nganceng tokon wie hitu agu huwi hawis terus kaut. Nenggitu kole ended Pondik toe kole bae liha campitn co'o keta tara nggitun emad Pondik wie hitu. Ae bom laseng nggitun olo main.

Le nggitu terus kaut panden tedeng wie hitu emad Pondik mai ended Pondik rei. "Eng ta emad Pondik co'o keta tara huwi hawis terusm hau wie ho'o toe nganceng toko. Lorong hitu kole aku toe nganceng toko le huwi hawis dehau. Eme kudut manga tombom hau tombo kali ga," rei de ended Pondik agu cempengn.

Le rei nggitu le ended Pondik ga loak tong reweng emad Pondik. "Neka manga sala nukm hau ta ended Pondik. Huwi hawis daku bo toet landing manga tegig, landing ali manga nuk. Elo pe ta ended Pondik aku nuk keta berita one koran Pos Kupang hio bao pe. Manga kraeng awo mai Rongkam bui 20 ntaung agu denda Rp 100 juta ganti bui enam wulang," nggitu tae de emad Pondik.

Le tombo kraeng awo Rongkam emad Pondik mai ended Pondik rei kole. "Ae co'o keta campitn tara pikir bail lehau kraeng hitu awo Rongkam. Apat latang iten? Hia ngai hian, ite ngai iten," tae de ended Pondik.

Le emong bailn nuk de ended Pondik, mai emad Pondik tombo liha co'o keta campitn tara nuk bail liha nang agu toe nganceng tokon wie hitu. "Nggo'o keta campitn tara pikir bail laku ta ended Pondik, nuk kaut lehau bui 20 ntaung hitu agu denda Rp 100 juta. Bui 20 ntaung hitu toe cekoen, leng bail keta behengn. Eme bui hia ceing keta ata urus kawe hang wina agu anakn musi mai. Nuk keta laku wina agu anak hindi haes mosed ali toe manga ata kawe mose," tae de emad Pondik.

"Hitu bui 20 ntaung. Poli hitu kole denda Rp 100 juta. Nia main keta emin seng do Rp 100 juta hitu. Neka ta Rp 100 juta, ata weli ci'e kaut dite ho'o toe manga seng, aben kole Rp 100 juta hitu. Eme toe bajar Rp 100 juta tambang kole bui enam wulang, tambang kole beheng," tae de emad Pondik.

Le tombo nggitu emad Pondik hitu di baen le ended Pondik co'o tara hole hales toe nganceng tokon emad Pondik Wie hitu. "Bo nuk dehau emad Pondik toe manga celan. Landing nggo'o pe tae daku e bui hitu kudu nang nai meu ata rona. Teser koe neka pande da'at. Neka nia kaut ita ata wina toe lelo anak ru pande kaut. Eme ata manga hae kilo nuk di'a koe. Nenggitu ata reba nuk dia koe pande. Neka nia kaut ita inewai," waheng de ended Pondik agu wale eng le emad Pondik. (kanis jehola)

Penulis: Kanis Jehola
Editor: Kanis Jehola
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved