Na'ang One Nai

POS KUPANG.COM, KUPANG - GULA hitu toe keta manga hesot lonton ended Pondik one kursi olo pendopo. Toe keta na'a wa de'it liha koran Pos Kupang. Toe kole manga lelo halaman cebana. Lelo kaut one halaman 9 NTT Life kanang. Cangga lelo hitu gelek ki wae lu'un ali retang.

Hi Pondik kaling ko lelo kin liha apa te pande de enden neho bao main. Nenggitu kole halaman ata lelo de enden bae keta taung liha. Hitu keta tara mesek laing liha, co'o keta campitn gula hitu tara lelo kanang halaman 9 Pos Kupang enden. Ae berita latang ata Manggarai lasengn one halaman 12.

"Eng pe ta ende co'o keta tara toe keta manga hesotn mata lite lelo koran hitu bo? Lelo kole ga hanang one halaman 9. Berita latang itet Manggarai ho'o manga one halaman 12," nggitu tae de Pondik rei agu enden.

Toe rodo wale le ended Pondik bentang de Pondik. Mbajik keta koes di'a wae lu'u itu po holes ranga wale rei de Pondik. "Nana..... de landing toe di bae le meu. Damang eme manga hae kilo rus cai pisa agu manga kole anaks du hitu keta le meu rasan co'o keta nai de meu nuk anak. Cewen kole eme henang le beti anaks," wale de ended Pondik agu hi Pondik.

Toe kin haeng le nuk le Pondik, co'o keta tara nggitu keta nuk de enden Pondik. Ae anak ho'o te beti ata remeng kapu le enden ho'o ata sale Labuan Bajo. Toe manga baen kole liha atan. Landing co'o keta tara retang laingn ended Pondik lelo gambar hitu one koran Pos Kupang.

"Nana, emak nggo'o keta nuk dehau bo co'o keta ende tara retang laingn lelo anakoe hot kapu kin le enden ali beti sale Puskesmas Labuan Bajo. Ami endem ho'o nana nuk kole one weki de ru. Du remeng koes meu danong nenggitu. Eme beti meu sengsara bog ami ata tua. Aku agu emam toe nganceng toko. Co'o keta sapong hau du beti," nggitu tae de ended Pondik.

"Aben kole eme remeng koe nenggo'o nana nai koen de ami te tu'a de. Ae retang terus kaut wie leso ejong meu, toe nganceng toko agu toe manga ngelor koe cekoen eme hang," tambang kole le enden Pondik.

Le tombo nggitu enden hi Pondik itu di caing le nuk le Pondik kaling ko nai koen keta ende agu ema eme beti anak. Pu'ung nitu main kole hia ga nuk weki run co'o keta pe eme manga wina agu anakn hia cai pisa. Emak cama neho ata tu'a ende sale Puskesmas Labuan Bajo kole susan.

"Na'ang one nai laku tae dite ende ga. Landing aku manga baca one buku. Eme kudu toe hena le beti hitu ite, ite paka jaga dia keta hang, neka manga hang temeng saki. Leke hang agu mok wae sio roco di'a keta, neka kemok kamok kaut le wae tebur. Nenggitu kole dea agu ute paka roco di'a keta. Eme jaga lite one mai saki situ ga ite toe hena le beti hitu," wale de Pondik agu enden. (kanis jehola)