Ama Tobo Inga Masa Lalu

AMA Tobo dudu di emper. Ina Feok ju ada dudu ko ma isi ubi kayu. Ini sore dong sonde ada kerja. Ina Feok ada cabut ubi di kobong ko mau rubus.

Pas makan ubi rubus, Ama Tobo deng Ina Feok carita nostalgia. Dolo, kalau nyong, pagi stan ganteng abis, tunggu bemo yang paling gaul. Bemo gaul tu artinya, ban radial, musik bas tongka langit, hiasan ful. Tunggu bemo gaul pikir mo duduk ke bos dimuka? Bukan! Lebe gaul kalo tagantong.

Kalau harim dong, hanya mau naek bemo gaul. Bemo gaul menurut dong masih sama ju ke nyong dong. Sopir deng konjak harus ganteng. Bemo gaul tu kalo cuaca bagus. Kalo hujan badai, apa sa yang penting ada atap, dong hantam pi. Makanya sopir bemo puruk dong paling bate'e kalo musim ujan. Kalo bisa pacaran deng sopir atau konjak, berarti lu paling cantik se-Kota Kupang!

"Ina ingat ko sonde. Waktu kitong masih muda. Pas beta nae katumu di pasar tu. Lu pung kamomos, ke nenek-nenek sa. Pas liat beta, lu lari sembunyi di rebis keos to."

Ina Feok su ba'iu mati sa deng Ama Tobo. Mamtua su mau habok sang Ama Tobo. Ontong sa Bai Ndu datang cepat.

"Ho bosong dua carita masa lalu su. Beken ke ABG. Liat aer ni. Su dua ko tiga minggu sonde jalan. Model su kamomos ke tikus lari masuk di tarigu ni." **