Menata Awal Masa Depan

Laporan Wartawan Pos Kupang.Com, Ferry Ndoen

POS KUPANG.COM, KUPANG - SORE Hari Bai Ndu su bagaya deng tampil necis. Dia su siap siap kow mau pi acara pesta wisuda di pung kunyadu pung anak-anak yang tinggal di Perumnas, Kelurahan nafonaek, Kot Kupang.

"Lebe bae lu ju pi siap su ko ikot deng beta ko katong dua pi acara pesta wisuda bet pung kunyadu ato bahasa Sumba Anakalng biasa pote deng angua pung anak-ana dalam rumah dong ada mau buat pesta wisuda," kata Bai Ndu ko ba ajak ame sam Ina Feok.

Ina Feok langsung malompat ame dar tampa dudu ko langsung pi kamar mandi. Dia siram ame di pung badan ko sa langsung masok kamar tidur ko mulai bastel dan bahodeng pake make up, badak deng oles bibir merah.

"Kalo soal makan... lu tar usa ba omong banya... kas kode sa bet langsung siap... Apa lai kalo soal pi makan... itu bet pung fak," kata Ina Feok.

Dong dua buru buru pi rumah di Parumnas. Doa dua orang pertama yang sampe. Dan tuan rumah liat dong yang sampe duluan..., yang punya acara minta Bai Ndu ko angka doa syukuran sekaligus untuk doa makan malam.

"Sebelum bet bardoa untuk acara syukuran wisuda ini, dan untuk makan malam, bet cum mau titip pesan sa buat ama Marthen yang berbahagia yang baru sa diwisuda jadi sarjana
Sosiologi Undana, ....It kartas ijazah yang lu baru dapa selama balajar di bangku perguruan tinggi itu cum jadi pendorong sa... tapi sakola ato kulia yang sebanarnya itu ada di masarakat," pesan Bai Ndu.

Dia cum minta untuk tetap smangat dalam menjalani hidup ini karna sesorang yang di wisuda itu baru awal dari sebua langka
menuju kehidupan yang sebenarnya.
Ina Feok yang dengar Bai Ndu pung kotbah... singkat sbelum doa makan.... dia cum katawa.

"Bet dengar lu pung baomong... bet inga kalo lu ju kulia sanin - kamis ma bisa jadi sarjana... dan skarang ju bisa jadi orang... mo bilang kaya ju sonde miskin ju sonde tapi bisa makan minum dan bisa hidoppp..," jempol Ina Feok inga dia pung kawan pung jalan hidop.

Bai Ndu cum colek ame Ina Feok pung pantat waktu pulang dar wisuda... dia bilang... smua jalan hidup ini Te Te Manis yang ator. "Manusia bole berencana tapi Tuhan yang menentukan jalan hidup setiap manusia," kata Bai Ndu (ferry ndoen)