Eme Guru Cio Ese Co'o Murid Ge?

Oleh Wartawan Pos Kupang, Kanis Jehola

POS KUPANG.COM, KUPANG - TOE keta manga campitn gula hitu. Poli kaut baca koran Pos Kupang, rodo-rodo kaut emad Pondik benta anak te winan hi Moni ata remeng gegan wa natas. Toe kole baen le Pondik agu enden, co'o keta tara nenggitun gula hitu emad Pondik. Ngoeng dise wi kali ga sendo kaut gegan hi Moni ae eme sekolah kole toe manga gega nenggitu ga.

Toe beheng poli benta, tuan hi Moni agu para. "Co'o keta bo campitn tara nggitun benta aku dite gula ho'o ta ema. Cala sendo koe gega agu ase ka'e so'o wa natas pe aku remeng libur sekola ho'o e. Ae eme sekola kole cai pisa ga toe manga gega nenggo'o," nggitu tae de Moni.

"Asi di rei do bail, lonto wa ho'o ga," tae de emad Pondik. Nenggitu lonto hi Moni, benta kole ise Pondik agu enden kudu lonto cama-cama, ae kudu manga tombon emad Pondik. "Nggo'o bo tara bentam laku hau Moni kudut tae hau com asi kaut sekolam hau ga. Kaling ko toe jarin gauk de guru te ho'on ga," tae de emad Pondik.

Le tae nggitu de emad Pondik, dengeng taung ise Pondik, enden agu hi Moni. Ae nuk dise toe keta manga campitn benang sekola anakn hi emad Pondik. Kali ko danong main ngoeng de emad Pondik agu sanggen taung ase ka'e dise kudut ngo sekolah dokter hi Moni.

"Ae co'o keta campitn tara rodo-rodo tae asi sekolan lite hi Moni ta ema," rei de Pondik agu eman. Eme ise enden agu hi Moni wi kali ga toe do mu'u, lelo kali wae mata nggelek baca taung pacu ali retang.

"Lelo lemeu one koran Pos Kupang ho'o, anak SMPN 5 Cibal na'ang weki ali ngoeng le guru de rud. Ata da'atn kole ga, woko na'ang weki enu ho'o toe kole gorin guru ho'o ata tanggung jawab," wale de emad Pondik agu Pondik cangga toto berita koran Pos Kupang.

"Ole co'o keta tara nggitun guru hitu ta ema. Cala guru ho'o pe cama neho ende agu ema de anak sekola one sekola. Guru hitu ata tei conto di'a one sekola kudu lut le murid. Eme nggitu pande de guru, apa te lut laingn le murid ga," nggitu tae de Pondik.

Ina hitu keta bo nuk daku tara tae asi sekola kaut dite hi Moni ga. Ae eme neho tae hio pe: guru cio remeng ese, murid cio cangga mburuk. Eme nggitu guru ga co'o gunan sekola ga. Apa te lut laingn le murid. Pas nga pande ciri da'at," tae de emad Pondik.

"Bo tu'ung tae dite ema. Landing nggo'o nuk daku, pande de guru hitu sale SMPN 5 Cibal bo pande de cengata kaut, toe sanggen taung guru. Neho tombo dise te melajun pe perbuatan oknum hitu ngasangn. Jadi ca sua guru te nenggitu, do kin guru ata dia panden," nggitu tae de Pondik.

"Landing nuk daku wi ema ga sekola kin dite hi Moni ho'o, neka rantang laing lite. Eme toe sekola kole hia tamba da'at. Eme kudu cai sial, konem toe sekolah hia henang kole pande da'at nenggitu," tae de Pondik agu ngedu ulun emad Pondik sendo sekola terus hi moni. (kanis jehola)