Bai Ndu Dapa Tilang

"Nyadu, polisi di situ tu ada suruh ko ame rokok lima bungkus. Sebantar abis tilang, baru dia datang ko bayar."

BAI Ndu baru balajar motor. Baitua tiap malam pinjam Ama Tobo pung Honda ko tapaleuk keliling kota. Su linca palan-palan, ma baitua balom berani bonceng orang.

Pas satu siang, Ama Tobo ada barenti ojek, Bai Ndu pinjam motor. Su pasti mus kastaduduk kas Ama Tobo laru. Kalo sonde mana baitua mau sorong konci. Tau sial kermana, Bai Ndu jalan sonde liat polisi ada batilang pas di bok.

Sonde bisa putar ko fuik, Bai Ndu tarima sa ko mau Dapa tilang. Ma baitua ju sonde ilang akal. Beken diri ke akrab-akrab sa dengan polisi. Pas polisi tanya surat-surat motor deng SIM, Bai Ndu langsung pusing.

"Beta ni baru balajar motor. Bosong ju tau kanapa ko ini hari tilang di sini. Biasa na sonde. Beta sonde ada surat apa-apa ni. Mau sorong konci, ini orang pung motor. Beta beli kas nyadu rokok sa ko."

Polisi su mau habok sang Bai Ndu. Tapi baitua linca. Orang bilang belut oles oli deng minyak kalapa. Polisi terakhir noe ju. Bai Ndu pi keos ko beli rokok supaya baru bisa jalan. Sampe di keos, baitua mulai pakaneo su. "Nyadu, polisi di situ tu ada suruh ko ame rokok lima bungkus. Sebantar abis tilang, baru dia datang ko bayar."

Sonde omong banyak, itu orang sorong lima bungkus filter. Sampe di polisi, Bai Ndu sorong dua bungkus, ais itu bangun fuik. Pas abis tilang, tuan keos pi tagih su di polisi. Polisi badiri ko puku testa. Tuan keos sonde mau tau. Tetap bayar. Polisi tanggung su to. Bai Ndu su ilang na. **

Penulis: PosKupang
Editor: Sipri Seko
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved