Pengalaman Jalan

AMA Tobo hari-hari lewat itu jalan pi pasar. Dari lahir sampe sakarang, baitua su hafal mati itu jalan pung nae turun.

Pas matahari nae, panas ke mo tabakar, baitua singgah di Bai Ndu pung pak laru. "Usir ini panas do." Ama Tobo langsung ame sabat ikan lawar ko dete di lidah. Bai Ndu liat dia pung parte datang, iko gabung. Minum sampe oleng, Ama Tobo minta pulang.

Pas mo langgar jalan, satu pik ap amper lari nae baitua. Ama Tobo maki su ma. Nenek moyang deng kebon binatang pung isi baitua kas kalur samua. Sopir pik up ju sonde tarima bae. Bapatua turun ko su mau habok sang Ama Tobo. Ama Tobo langsung sambar na.

"Lu sonde ada mata ko. Lu pikir ini lu pung jalan sandiri. Lu kalo sonde tau bawa oto na jalan pe'e mata sadikit. Jang beken ke orang buta."

Ini sopir yang ada mo pi iko demo angkat falungku ko mau habok sang Ama Tobo. "He, tua kakaluk. Lu tau ko sonde, beta ni su dua puluh taon jadi sopir. Jadi sonde mungkin beta salah. Lu yang mabok, makanya jalan mata ili ala pi tampa laen ko sonde liat oto mo lewat."

Ama Tobo katawa sampe raroso di aspal. "Hee.. lebe bae lu diam. Lu su yang sopir tanganga mau kas salah beta lai. Lu baru sopir dua pulu taon sa sombong. Lu mau tau ko sonde. Beta su mau 60 taun jalan kaki di sini e. Beta lebe pengalaman dari lu. Lu jalan su, nanti anak-anak datang lu noe memang." **