Naka Manga PLTA (1)

POS KUPANG.COM -- TOE keta manga emon kelong de emad Remus. Pu'ung kaut dilad listrik mane hitu mbetat terus keta runing wa'in le kelong. Ngong te dansa agu empon ata remeng emben lut musik one mai HaPe.

"Ho'o tu'ung tae majun ka'eng tana lino ho'o ga. Emak ho'o tae surga ata itan one tana lino. Ae ho'o te umur pitu mpulu ntaung aku ga ka'eng one lino ho'o toe keta manga itan laku gerak nenggo'o. Kaling le pintar de uwa weru ho'o ga wae nganceng pande gerak laing," nenggitu nggut de emad Remus cangga asi le mael gi kelong.

Tara bengkes bailn emad Remus ae pu'ung wie hitu sanggen mbaru one desa dise gerak le listrik PLTA (Perusahaan Listrik Tenaga Air) taung. Ae bo gerak listrik ali pake genset bae ga'a gi le emad Remus. Ae mbaru dise toe tadang agu mbaru dise Pondik ata lete wie gerak pake genset. Nenggitu kole gunan listrik bae kole taung liha ga. Ae kudut sanggen taung lokn one mbaru dise Pondik liha poli lelo taungn ga. Landing gerak listrik one mai wae hitu keta nga di ita le matan emad Remus.

Pu'ung kaut dilad listrik mane hitu do kole nukn hi emad Remus ga. Pu'ung one mai nuk weli tep, aktif speaker, televisi, kulkas agu sanggen taung perewang ata nganceng pake eme manga listrik. Sanggen taung perewang ata manga one mbaru dise Pondik ngoeng taung te weli kole hia.

"Pu'ung no'o mai dite eme delek koe seng pika kopi agu cengkeh damang koe tihong-tihong koes kudu loet koe welid perewang one mai mbaru neho dise emad Pondik hio," nenggitu tae de emad Remus agu ende de Remus agu anakn hi Remus.

Toe manga te toen kole lise Remus agu enden. Pu'ung nitu main ise weli rice cooker latang teneng nda'uk, televisi, aktif speaker, kulkas agu sanggen taung perewang one mai mbaru te mose le pake listrik. Nenggitu kole perewang dapur ata kudu teneng.

Pu'ung nitu mai ise Remus toe keta weleng sa'i teneng nda'uk eme dureng mese. Toe manga kembuk nus agu wara mata kole le pur api toe dila lut pake haju bakes. Eme kudut teneng nda'uk ise ga ceka kaut cok one listrik toe beheng rua agu mame. Boto lik bail kole one mbaru gu'ut le dureng, toe manga asi de'it kole runing musik. Iung aung terus kaut toe senget tau runing musik senget dere disa mekas Makarius Arus agu dise Ambang. (kanis jehola/bersambung)