tombo tombo

Pande De HaPe

SUA ntaung wa ga, ka'eng kilo dise emad Remus toe keta manga neho biasan.

POS KUPANG.COM -- SUA ntaung wa ga, ka'eng kilo dise emad Remus toe keta manga neho biasan. Lete leso eme manga lingad kengkel weki lonto cama cangga tombo-tombo agu lao keta tawa eme manga te lucun. Nenggitu kole eme manga perlu cama tau mbajik keta tombo cama tau.

Landing du pu'ung kaut manga HaPe dise ga toe keta manga itan te nggo'o di'a-di'a koe reman lonto cama lete leso. Wela kaut mata le gula wieng kole HaPe. Konem po lai cas kaeng'd one mbaru landing neteng weki sibuk urus de rud kali. Neteng keta weki toe keta manga ledo wa HaPe. Co'o keta maen facebook ho'o. Ngoeng te imus hanang koe eme poli baca tulis one HaPe. Toe keta manga imus ali di'an tombo cama tau one mai mbaru.

Ata da'at laingn ga eme manga cai meka. Tegi apa-apa kau de emad Remus agu ended Remus ko agu hi Remus toe keta manga tombo dungka. Sanggen keta taung tegi pake eS eM eS. Eme kudu tae ended Remus musi dapur pande kopi eS eN eS kaut le emad Remus olo mai pendopo bate lejong. Nggitu kole eme tae hi Remus emi rongko one kios eS eM eS kaut le emad Remus. Nenggitu kole ended Remus. Eme taung gola agu ci'e one dapur eS eM eS kaut kole liha emad Remus agu hi Remus.

Nenggitu terus kaut pande dise lete leso.

Ca leso ga emad Pondik ngo lejong one mbaru dise Remus. Cai one mbaru dise Remus toe keta manga dengen ngaok atan one mbaru. Lik tu'u-tu'ung keta one mbaru hitu. Bo keta cengka kin para mbaru be olo.

"Manga ko co'o atan one mbaru ho'o ga? Eme manga atan co'o tara toe keta manga ngaok'd. Eme toe manga atan, co'o tara toe tadun para mbaru ho'o. Damang de ngo lelo laku de," nggitu ki wa nain emad Pondik cangga agu pa wain ngo lelo ata one mbaru dise emad Remus.

Kaling ko tu'ung keta pangong diha. Hi emad Remus, ended Remus agu hi Remus mangas one mai mbaru hitu. Landing toe lonto lai cas. Toe kole manga tombo taud. Lik keta. Emad Remus lonto one para kilo. Ended Remus lonto one para dapur. Hi Remus wi kali ga lonto one lobo kursi. Sangged taung ise te telu wieng HaPe taung one limed. Remeng maen facebook taungs.

"Ole kali ko manga taung meu e.... Bet daku bo toe manga atan one mbaru ho'o," nggitu bentang de emad Pondik. Landing toe wale dungka bentang de emad Pondik le emad Remus. Walen wi kali liha ga pake inbox one facebook de emad Pondik. "Mai ga lonto cama-cama maen facebook," nenggitu wale de emad Remus agu emad Pondik.

Beheng wa lonton emad Pondik toe keta manga cengatan koe ata bentang hia. Kaling ko bentang one facebook lise emad Remus bo. Emon wa ali toe tara manga te bentangn, emad Pondik kole emi HaPe'n buka facebook. Lelo nggo'o liha ga manga ca pesan masuk. Nenggitu buka, lelo nggo'o liha ga kaling ko pesan one mai emad Remus.

"Ole.... nenggitu taung pande de meu eme bentang meka mai lejong ko? Pake facebook. Kudut bae le meu e, neka sala gunad barang so'o. Tara mangan HaPe ho'o toet kudu boto lejong tau ko boto tegur taud ite, landing kudu campe ite eme manga perlu agu ase ka'e tadang dite. Toet nggo'o manga hape ho'o kudut toe tombo taud ite," nggitu waheng de emad Pondik. Pu'ung nitu mai dise ga toe danga pake HaPe eme tegur meka. Nenggitu kole one ca mbaru dise pu'ung kole lejong taud. (kanis jehola)

Penulis: Kanis Jehola
Editor: Kanis Jehola
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved