Mbaler Keta Toko (4)

POS KUPANG.COM -- LAUN wie ca, poli toko lai cad ise Romi agu hi Moni ga. Ca mbaru ka'eng, ca kilo toko agu ca kole loce tokod. Hitu de tandan ga ise Romi agu hi Moni jadi wina agu ronas, konem po ise kawing kampong kaut. Ai toe di ngo tombo agu tuang pastor kudu berkak one gereja.

Nenggitu gerak tana, doing hi Moni. Landing toe to'o wa mai loce toko. Toko wela wa kaut. Du hitu hi Moni nuk kole musi beon. Nggo'o nuk wa nain, elak ca leso kaut hia ka'eng agu toko one kilo data rona. Toe anak molas kole hia ho'o ga. Agu manga kilo kole ga. Toe keta besik neho ka'eng kilo data molas do.

Cekoe hia nggelek wae lu'u ai nuk ende agu eman one beo. Cewen kole lako diha wendo agu ata rona toe di bae le ende agu eman. Toe manga cengkalin koe hia tombo ge ende agu eman kudut hia wendo tau agu ata rona. Ise ende agu eman kole toe keta manga nuk te nenggitu lise wintukn hi Moni, ka'eng kilo le wendo tau kaut.

Emon nggelek wae lu'un hi Moni ga koso kole le run. "Eeee nasut co'o moley mose daku, baram ho'o muing wada daku le morin, nenggitu kole lise ende agu ema. Tamat nggo'o wi kali ga aku delek ata rona cama neho te ngoeng daku, reba dia, pegawe negeri agu sekola mese kole, sarjana (S1). Maram poli hitu tai po retus keta bantang urus weki gise ema agu ende," nenggitu tae de Moni.

Lelo cupu mai racap mbaler ki tokon hi Romi. Toe holes. Nggorok keta marengn. Nggo'o wi wa nain hi Moni ga emak le kamer lako tadang one wie. Kong kaut asi kengkon. Maram asi kaut ngo mengajarn di leso ho'o. Bom toe weki run kepala sekolah. Nia kaut ator de run, bom manga ata te perentan.

Woko toe to'o hi Romi ga toe kole to'o hi Moni. Kudu to'o hanang koen kole hia ga ritak inang agu amangn. "Com toko kolek. Maram to'o hi nana ho'o tong po to'o kole aku. Cama-cama," nenggitu wa nain hi Moni. Ise tesua toko koles ga. Nenggitu jam 11.00 mas pucud ga ali darum. Hi Moni agu hi Romi cama-cama to'os. Cangga lot wekin to'o toko, hi Romi omar kole di hi Moni agu imusn. Woko omar le Romi imus kole hi Moni. "Nana, mas pucu daku ga. Bao aku darum ga," nenggitu tae de Moni boto beheng bail keta antul imus le Romi.

Bengkes keta naid. Du to'o dise Moni agu hi Romi mame tong nda'uk le ended Romi ga. Landing eman hio bo gula-gula lako ngo liwing kaba. Toe di kole ina lai ca agu ngo teing purang kaba. "Nana, enu hang ga, poli mame laku nda'uk boga," nenggitu tae de ended Romi. Toe beheng-beheng ise te sua ngo kobe nda'uk agu hang cama ise te sua ga. (kanis jehola/bersambung)

Pos Kupang menerima sumbangan tulisan berupa cerita-cerita dalam bahasa daerah Manggarai. Panjang tulisan 150 kata. Kirimkan tulisan Anda melalui email: poskpg@yahoo.com, atau email: kas_kanisjehola@yahoo.com