tombo tombo

Bet Lo'o Gula, Kaling Ko Wae Cio

Sekolah de uwa weru ho'o ga woleng keta agu sekolah du uwa dise Pondik danong. Du uwa dise Pondik danong ngo sekolah tadang one mai beo

Bet Lo'o Gula, Kaling Ko Wae Cio
Ist
Anak-anak yang menjuarai lomba membaca dan puisi foto bersama dengan guru-guru pendamping dan Danramil 1618/02 Eban, Letda (Inf) Jemri Mamengkoe, usai lomba, Jumat (31/5/2013) lalu. 

SEKOLAH de uwa weru ho'o ga woleng keta agu sekolah du uwa dise Pondik danong. Du uwa dise Pondik danong ngo sekolah tadang one mai beo. Lako wa'i lete leso agu salang cebut le remang okade agu karot kanang ai salang koe. Toe kole manga bokong seng one cikang baju agu deko ae anak data kasi asi kanang.

Eme manga kali bokong ga latung cero ata toe mame di'as. Manga te muntung agu manga kid kole ata ta'ad. Ata toe bokong latung cero wi ga hindi haes ta'ong darem. Landing tara di'an ga  sekolah du uwa dise Pondik danong ata tu'a kanang. Ine wain nganceng jadi ende laing. Nenggitu kole ata ronan ga nganceng jadi ema laing.

Eme sekolah de uwa weru ho'o ga di'a bon. Sekolah ga ruis agu mbaru ka'eng. Lako kole one salang mese nggelis bon aspal. Hitu kin toe lako wa'i.  Eme ngo sekolah paka leti bemo eme toe leti motor. Manga koles ata leti oto de rud. Hitu kin bokong seng one cikang deko agu baju, co'o kudu weli kokis one sekolah. Landing te wolengn kali ga ata sekolah SD te ho'on  do te remeng koe kin. Do te toe di bae urus weki.

Landing hitu du uwa dise Pondik, woko sekolah ata tu'a kanang lorong hitu kole rurap pande. Cewen kole hi Pondik do keta pande kose atan. Manga-manga kaut panden hi Pondik kudu pande kose ata hae sekolahn. Do ata roba one salang ae tenang nggoko le Pondik one salang keot.

Ca gula du ngo sekolah, hi Pondik gula-gula lakon. Melet keta lako gulan leso hitu. Cai one salang keot ata do keta remangn lor nggere one salang, hi Pondik pongo remang situ. Poli hitu liha wewar wae cion one remang situ. Poli cio one remang situ hi Pondik gelang-gelang lako nggere one sekolah. Cai one sekolah hia midos keta lonton gereng cai anak sekolah iwo.

One sekolah hi Pondik ga hitu di lakod anak sekolah hio te ca beo agu hi Pondik. Melet keta gula hitu kole lise toe itan hi Pondik. Lasengn hi Pondik eta leso taung po ngo sekolah.

Cai one salang keot hio te do remang bo, lako kaut anak sekolah sio te ca beo agu hi Pondik. Baca taung baju agu deko dise ali hena le wae cio one remang situ bo. Landing toe bae le anak sekolah sio bo ata baca baju agu deko dise hio bo wae cio de Pondik. Nuk dise kali ga wae hitu one remang bo lo'o gula.


Nenggitu cai guru one sekolah kudu pu'ung sekolah leso hitu, tuang guru toe manga metekn ali rasa cengi cio. "Anakoe apa keta de tara cengi bailn gula ho'o bo, cala cio ngai dekos meu one wie," nggitu rei de tuang guru. "Toe manga ooooo bapa," wale de anak koe sekolah so'o agu pasur deko agu rokd. "Cengi apa wi ho'o ga?" rei de tuang guru. "Toe kole baen lami oooo bapa. Bet dami bo ata rasan one isung dami kanan," wale de anak sekolah so'o.

Maing nitu main anak sekolah so'o penggong taud ata cengi. Manga te ngaok tau ali penggong tau. Kaling tara leng keta cengi bo ali sanggen taung baju agu deko dise ca kelas baca le wae cio de Pondik taung. De Pondik kanang ata toe manga cengin. Le toe ta'ong wau cengi cio hitu ga, tuang guru susung kole taung anak sekolah situ. (kanis jehola)

Pos Kupang menerima sumbangan tulisan berupa cerita-cerita dalam bahasa daerah Manggarai. Panjang tulisan 150 kata. Kirimkan tulisan Anda melalui email: poskpg@yahoo.com, atau email: kas_kanisjehola@yahoo.com

Penulis: Kanis Jehola
Editor: Benny Dasman
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved