Pande De Riben Neni

DU remeng werud kacamata riben neni danong do keta te pande adong atan. Hi Pondik kole ca atau pande adong ata hitu. Ae woko ata bora pe donde keta ngo lako one kota. Ngo senang-senang agu ngo weli barang ata pika. Bom nuk seng lako ae manga oto ru.  Eme manga ata werud pika one toko gelang keta baed taung liha.

Du ngo kole one baban hi Pondik, lelo  liha weo kid kacamata riben so'o. Mai hia tegi agu baba kudu tasang one mata diha. Du poli tasang nanang keta te weli kole hi Pondik. Nggo'o tae wa nain di'a keta eme pake lako leso. Toe keta celap mata ali gerak leso. Agu eme pake nau keta lelon lata.

Ca leso hi Pondik reje hi Remus ngo cebong one wejang wae. Toe na'a wa kacamata riben de Pondik. Pake terus nang one wejang wae. Baen kaut wejang wae musi beo, toe manga tadun. Deming kaut pele le remang ata todo baling mai sosor wae. Toe pake siding ko kilo koe neho tempat cebong data one kota. Sosor wae hitu kole pande one mai haju pering, toet one mai beci pipa.

Cai one wejang wae hi Pondik agu hi Remus ga kaling neho baod ise Moni agu Rina. Hi Moni remeng cebongn. Co'o leng cebong data one beo danong cebong laco kaut. Eme hi Rina wi ga remeng cucin ngai ga gereng poli cebong de Moni.

"Uu....cebong..." Nggitu gul dise Pondik agu hi Remus suampulu meter one mai wejang. "Cebong... ce'e..." wale dise Moni agu hi Rina one mai wejang wae.
Poli wale hitu ga ngo ngandek li Rina ceing so'o te gul cebong ho'o. Lelo nggo'o liha ga hi Pondik agu hi Remus ese kid one salang. Hi Pondik pake kacamata riben neni, hi Remus ga mata kanang.

"Hi nana Pondik kali nganceng lako ae toe ita liha to'ong cebong di Moni. Landing hi Remus kali ga asi di mai, kong eta hitum hau nana," nenggitu tae de Rina.
Ali tae nganceng le Rina ga lako tu'ung hi Pondik te pake kacamata riben neni hio bo. Cai one sosor ga ole di'a nain keta lelo le Pondik hi Moni ata remeng cebong lacon. Lako olomai, musimai toe manga ata re'ingn. Hi Moni kole ga biasa kin hia cebong ina hio taen bo toe ita li Pondik.

Poli lelo cebong de Moni ga kole kaut hi Pondik. Reje agu hi Remus liha kudu kole ise ga. Nggo'o kaut adong beheng bail cebong dise Moni agu Rina. Imus terus kaut panden. Kaling wa nain hi Pondik ga maram asi cebong tamat poli ita cebong de Moni. He he he, pande de toe bae riben neni. (kanis jehola)

Pos Kupang menerima sumbangan tulisan berupa cerita-cerita dalam bahasa daerah Manggarai. Panjang tulisan 150 kata. Kirimkan tulisan Anda melalui email: poskpg@yahoo.com, atau email: kas_kanisjehola@yahoo.com