Teing Tana Tadu Raung

MANGA ca kilo ata ngasang ronan ga hi Markus agu winan ga hi Sisi. Wina rona so'o ngonde keta ngo duat. Ngoeng dise kali ga cebo hang. Pu'ung ka'eng kilo dise agu ge ca ro'eng toe manga bae kin lise ngo duat. Ai hiop bo e manga kin ise Ende agu Ema.

Ata bora eros Ema di Markus ho'o, bom emong ba eme ako woja du cekeng suampulu karung nenggitu, eme kelang campulu lima karung. Ngain ki kopi agu cengke lanar pina naeng. Mai tae di Markus ngong winan ga "ta Sisi kudut co'o kali lite bora data tu'a so'o ga eme toe kudut pande taungs, ite kali ga cebo keta hang agu piara weki."

Nenggitu mose dise leso-leson, hang kanang pande agu kartu kanang caun hi Markus. Lelo kali ata tu'a ga dempul wuku tela toni, ai le pari du leso. Bom pinga hitu le wina rona so'o, ata bae disen kali ga ngo ombeng agu cebo hang terus. Wina rona so'o toet senging ngonde. Cebo tombo ngasang data koles iwod.

Eme manga denge lise raha tau wina rona data, lise keta tombon gu ata pang olo ngaung musi. Ai toe ngo duat pe, cebo tombo ngasang data, cebo hang agu cebo maeng kartu. Eme manga ata bora lise, ko ata sekolah anak, tombo hitu dise ga ai iri pe, musuk bora dise. Tombo ho kole bom tombo di'a lise ata hitu, tombo mbecik kanang. Mu'un hi Sisi ga jopor cengkali agu hi Markus ga pekus keta lonto maeng kartu.

Rapak ca leson ge, kole one mai uma ende agu eman hi Markus. Cai one mbaru beti da'at ema di Markus, beti ho'o toe nganceng holes landing le kamer bail. Landing toe pinga hitu li Markus, dihan kali ga cebo cau kartu. Ende di Markus kali ga toe tombo do, urus hanangkoen kaut beti de ema di Markus liha. Anak agu wote ga camas kali wintuk, pande beti nai data tu'a taung.

Lewe len beti de ema di Markus ge lorong nggitu toe ngo la'at uma. Woja taung hang le peti, nggitu kole kopi loda taung ai toe manga ata pua agu hang le niki. Anak agu wote kali ga cebo ombeng agu cau kartu. Ca ntaung de beti de ema di Markus ge, hitu kin ba weki de wina agu rona so'o.

Taungs woja ne joreng agu taungs kopi le pika kudut maen kartu di Markus agu kudut weli bedak agu deko lejing di Sisi. Co'o kali panden hi Markus celong ringgi data kudut boto lego liha kartu, nggitu kole hi Sisi. Tedeng wulang dise nenggo'o kanang panded, cebo celong ringgi data. Te ngo duat ise so'o tong ai bom bae lise cau beci agu bancik.


Pisa wulang wa ge, pe'ang one ata ngo paing raung one mbaru dise. Wale de enden kali ga  aik du wangka so nana agu enu, toe manga baen laku. Co'o kali panden hi Markus agu hi Sisi ga, teing tanah data tu'a kudut tadu raung situ sampe agu turung cemol teme tana mbaru kanang ata mangan.

Ro'eng di Markus du hitu ga enam mongko, co'o keta lihas piara ro'eng so'o ngai beti da'at eman bo, ai du pika tana so pe agit ca sebun liha weli rewos de ema ho'o. Apan kole ga, retang tegi gesar agu ata tu'a. (tensy ferdinandh rea chiokz)


Pos Kupang menerima sumbangan tulisan berupa cerita-cerita dalam bahasa daerah Manggarai. Panjang tulisan 150 kata. Kirimkan tulisan Anda melalui email: poskpg@yahoo.com, atau email: kas_kanisjehola@yahoo.com