Tombo tombo

Toe Kope Ho'o, Putes Daku

BENGKES keta nai'd ata reba agu ata molas eme tiong wulang pitu ko wulang alo. Wulang situ taed, wulang "gego lino" ai dod keta pesta sekolah.

BENGKES keta nai'd ata reba agu ata molas eme tiong wulang pitu ko wulang alo. Wulang situ taed, wulang "gego lino" ai dod keta pesta sekolah. Gereng keta neteng mbaru hese kema one ca beo. Cai du hitu kole mangkang ketas cikangd ai cekeng wua kopi pe.

Dod kole pesta lorong hitu dod kole raha tau. Mangas ata  raha campit rumbu ine wai, manga koles ata raha ali haeng loma wina data. Itu tara ca wie hi lopo Tina ngaok ketay sina mbaru. Ai denge liha hi Nadus anak ata ronan bantang ngo pesta sina Golo Gota  agu hae reban.

"Nana e..., ngoeng keta mborek uteks ali peke le watu lata meu a? Cala bae pe le meu ta nana, eme manga pesta lau Golo Gota hitu raha terus kaut," taed lopo Tina sili mai dapur, suwir kin lime koen rojok loce'n.

"Toe mangan ta ende yo, co'o tara simpung dite. Tama keta mberes mburuk pe eme tu'ung manga raha diang e," ne nggitu sosok enden hi Nadus.

"Bo dami  ta nana, nia kaut tae de meu. Tama dia-dia du loasm pe kali laku danong e," ne nggitu kole wale di lopo Tina.
                                                        
Neho diang manen, nggelok keta cebongn hi Nadus ho'o agu melet keta cebong agu sabung'n. Ai laseng'n pe hia e, kembelu'ak da'at. Nia ngoeng cebong ko toey eme we'e lau mai uman.

Di'a ketay neran wulang eta awang du wie hitu agu leng keta dila matad ise Nadus agu hae reban ali ita "molas sekolah" so'ot mai pesta sina Golo Gota wie hitu. Toe keta manga lelo banan hi Nadus, lelo keta ngoel bocel'd. Reguk ilurn hi Nadus woko ita ine wai molas so'ot ombeng ketas wuk bonding'd. Toe keta repa matan.

Holes cekoe kaut matan hi Nadus ho'o,  ndeser muing dara wekin. Ita liha ca ine wai molas cebo keta porong ngger one hian. Molas de ine wai hitu haid darat sili mai Rana Mese. Bakok keta wekin agu tonggor keta isung mongkon.

"Mori, co'o keta campit'n tara porong akun ine wai ho'o. Am ho'oy daku toko racap ata katu dise ema lopo le main. Eme tu'ung keta e, com do-do muings mbeled laku manuk kudu teing hang ise ema lopo situ." Hitu tae wa nai koen hi Nadus ho'o.

Toe beheng poli hitu hi Nadus ho'o ngo ruis agu hi enu hitu. Bengkes keta nain woko imus padoy ine wai hitu agu hia.
Don tombo, don kole joak. Di'a ketas gandad ise Nadus agu ine wai hitu bo ge. Kali anak ine wai ho'o bo ga anak de tu'a golo sina mai beo Lenda. Raes keta tawa sua taud. Eme neho tae data joak, nganceng hemong ngasang run hi Nadus ali di'a bail ganda.

Telu ngkali ngetukn hi enu ho'o bo woko tegi dangsa li Nadus. "Ceh, lalong raci ndai ngai le ine wai," hitu paci wa nain hi Nadus.

Lerem keta matan hi enu agu lelap keta nain hi nana wajo le jejong dere "Dangsa Serehang Tana". Toe beheng wa, gege hi Nadus ho'o agu semak muing rangan ali rasa liha manga kaka ata cirang one mai baju de ine wai ho'o bo.

"Am lading eme toe kope keta bolo mai tukan ine wai ho'o ta de. Am get kudut jelok akuy poli ho'o to'ong." Hitu tae wa nai koen. Du hitu di betn li Nadus re'ing ngo pesta le enden one wie. "Ata jera lata ine wai ho'o ta," wa nain hi Nadus.

Toe beheng di Nadus ho'o denur ine wai hitu bo. "Enu, neka keta pande le hau tara mata padog aku e!! Toi agu lawa pesta so'o laku to'ong, hau manga ba lading agu kope bone mai bajum." Ancam di Nadus agu ine wai hitu.

Wara rangan enu hitu agu loda muing wae matan. Agu retang'n
Mai taen ngong hi Nadus, "Nana, toe kope ko piso bone mai baju daku. Putes daku ho'o."

Kali ali sala ketek'n danong putes de ine wai ho'o tara mbodol neho keta corang kope bolo mai tukan. Toe ngaok poli hitu hi Nadus agu toe gereng hae reba'n kole kin ngger le beon ga. (Epifanius B. Jehudin, Mahasiswa Prodi PGSD di STKIP St.   Paulus Ruteng)

Editor: Kanis Jehola
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved