tombo tombo

Tapa Sekang

REME koe kin hi Cedo. Toe di ngo sekolay. Toe kole di nganceng tadang agu enden. Nia kaut lakon enden, nitu kole hia dindorn.

REME koe kin hi Cedo. Toe di ngo sekolay. Toe kole di nganceng tadang agu enden. Nia kaut lakon enden, nitu kole hia dindorn. Konem nggitu, molor gi te tombo. Nganceng kole te jera laing. Neho rapang, jera ngo tegi api le enden, ngo kaut hia.
Ca leso ge, ngo duat uma ende agu eman. Bo tae de enden asi lutn hi Cedo, landing ndai kole hia. Hio bo, toe di nganceng tadang agu enden hi Cedo. Cemoln ga cama-cama agu hias ende-eman ngo duat.
Cai one uma, toe lampuk ciwal remang enden. Cama-cama agu hi Cedo, ka'eng one sekang di enden, kete api kudut reok ute agu teneng hang latangt lompong leso. Woko poli teneng ga, ngo pe'ang ende ho'o one mai sekang, ngo ciwal remang cama-cama agu ema di Cedo.
Nggo'o keting de enden kamping hi Cedo. "Nana, ngo ciwal di kaku. Kong cee sekangm hau. Neka ngo pe'ang. Leng kolang leso ho'o pe'ang. Hau ga mber acu boto hang kebas hang so'o to'ong."
Bo ndai kole hi Cedo. Nggo'o taen kamping enden. "Ogok ende, rantang kaku ka'eng hanag no'o." Konem ne nggitu, benang kin le enden. Cemoln ga ka'eng one sekang hi Cedo.
Poli taungs pedeng sangged weang one sekang hitu le ende di Cedo bo ga, landing api wa sapo sondang kin gawokn. Nggo'o nuk de enden, boto kete api kole eme hang leso to'ong.
Jo'uk kin bo hi Cedo one sekang ge. Landing remon wa toe ta'ongn ga. Todo humern kudut gega ca ko ca atat nganceng gega laing one sekang hitu. Lelo liha api wa sapo mose kin. Cempong liha api hitu poli hitu pur. Naka di cedo woko ganggor dilan api hitu.
Leng bail naka di Cedo, toe manga nuk ata da'atn liha one mai api hitu. Emi kaut liha haju api atat reme dilan, sote one ri'i so'ot ndoes kid eta mai wuwung sekang. Di'an kali cang agu sote api hitu, lako kin wa'in wa ngo be pe'ang mai sekang.
Sekang dise Cedo ho'o pande one mai haju betong agu pering. Eta main ga tadu le saung ri'i. Wuwungn tadu le wunut. Danong main sekang hitu ga. Sagang taungs betong, pering, ri'i agu wunut situ ga.
Toe beheng poli soten li Cedo, dila haokn api hitu etan. Tambang keta nakan hi Cedo. "Huuuuu!" Nggepak kole limen. Poli hitu benta liha enden. "Ende, dila api ga. Api taung sekang dite ga!"
Calak denge le enden benta di Cedo, haeng eta wuwung sekang api ga. Gelang-gelang mburuk ende agu ema di Cedo, landing toe nganceng pampang api hitu. Calak cai sise, rencog sekang wajo le api hitu. Hang agu ute ata poli mamed one sekang hitu bo muntung taungs ga.
Retang ende di Cedo momang sekang hitu. "Ceing ata jera hau tapa sekang ho'o bo? Wajo ga, muntung taung sekang ho'o," rabo de ende di Cedo cang agu pak one pacu di Cedo. Gege hi Cedo le pak de enden. Retang kin ga.
"Co'o neng tara ledo hanang koeg aku li ende bo. Woko muntung sekang ga, ongga kole aku hi ende," wale di Cedo kamping enden agu kocel matan le retang. (agus sape)

Penulis: Agustinus Sape
Editor: Kanis Jehola
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved