Tombo tombo

Hi Lawang Agu Lawung

EME tombo bugu ciwal uma, toe nganceng haengn bugu de Lawang. Neteng ntaung hia tiba uma one mai tu'a teno sua moso.

EME tombo bugu ciwal uma, toe nganceng haengn bugu de Lawang. Neteng ntaung hia tiba uma one mai tu'a teno sua moso. Konem mesen uman e.. maik nganceng kin tangkon liha ciwaln. Itu tara ngengur taung ulu data tu'a ca beo, ai neteng ntaung hia dani latung agu woja.
One ca ntaung, melet keta hi Lawang toe tiba moso agu ata don.  Hia rimu tobok ledong dise ende agu ema lopon pande uma. Uma hitu leok ali pong mese one mai cicingn. Penong kole kode agu motang.

Bo du pu'ung rimun, tapa nang agu weri latung agu woja toe manga co'o-co'on. Nenggitu kole du todo latung agu woja nang agu wuad. Bengkes keta nain hi Lawang woko lelo wua latungn wole keta. Ae co'o te toe wole laing woko toe sendo todo remang uman hi Lawang.

Pu'ung weleng sa'in hi Lawang ga du pu'ung ici ca-cad latung situ. Nia toe weleng sa'i laing hia. Ai cang te cai hia, lelo one cicing poli koles wa'ekd latung wole ga. Toe manga baen ceing keta ata takod latung situ.

Ali nggitu terus neteng leso, ca leso hi Lawang ngo ngapeng. Hia mekep one bombo woja agu latung agu saung tago. Nenggitu pedek leso, denge li Lawang ninut dere reweng de anak molas. Hemel keta rewengn, pande lemot nai. Ali denge dere hitu, hi Lawang ngo kawe. Lako diha pesot kaut ae boto denge runing wa'in.

Cai one ruis ata dere hitu dengeng kole hi Lawang. Ai lelo liha ata molas eros remeng wa'ek wua latungn. Eme neho tae data tu'a, nggade keta bokakn. Loke wekin bakok keta,  halep neho dea rakot.

Nenggitu ita anak molas hitu, hi Lawang denter keta nain. Hia lako pesot wa'in maing musi mai toni de anak molas hitu. Woko ruis gi, hi Lawang nggao maing musim mai tonin anak molas hitu. "Ho'o keta haengm laku hau, kaling ko hau keta taung ata tako latung daku. Ceing ngasang de hau?"  "Ngasang daku Lawung," wale de enu hitu.

Ali mberes bailn nggao de Lawang, hi Lawung  toe nganceng wulin. Hia uncang wekin kaut: "E... nara nia kaut pande dite, maram mbele le kope aku lite leso ho'o  toe co'on."

Ali wale hitu di Lawung, wa kole nain  hi Lawang. "Nggo'o kali enu ga aku toe co'o co'om laku hau. Landing hau paka gori kawing agu aku, jadi wina daku laing hau." Mai wale de Lawung, "Eng laku tae de hau nana. Landing ca kali tegi daku, eme tu'ungm hau ngoeng agu aku neka hang nuru kode hau. Paka neka lage le hau tae daku hitu."

Pu'ung nitu maid ga hi Lawang agu hi Lawung jadi wina rona. Kaeng kilo dise rejek keta. Toe manga lewang agu ngaok taud nang agu manga anakd ise.

Ca leso du ngo teku wae hi Lawung, hi Lawang ngo bang acu one pong. Cai one mbaru olong hi Lawung. Toe beheng kole cain hi Lawang ba agu nurun. "Ho'o nuru ba daku, tenengs kali enu ga."

Bo keta olong laing bengkes keta nain hi Lawung ali delek nuru hi Lawang. Ai pisa wulang ise toe manga hang nurud. Landing nenggitu cengka rokotd ga, lemar muing wekin hi Lawung, agu gelek wae lu'un. Ai lelo liha nuru te ba de Lawang nuru kode. Hitu kin rempa limed.

"Landing woko lage le hau bantang dite nara ga, e...bete ite te sua ga. Hau ngai haun, aku ngai akun." Poli tae hitu wewak kaut wa agu Lawang anakn hi Lawung, poli hitu lako hia ga agu ciri kode kole. Pu'ung nitu main bete ka'eng kilo dise te sua ga.

Ka'eng kilo de uwa weru te ho'on ga do kole ata cama neho ka'eng kilo dise Lawang agu Lawung. Apa te poli retus bantang cama du toe di kawing lage le ru kole du poli kawing. Ata rona ilang wina data ko anak molas data. Ata wina kole nenggitu, ilang rona data ko anak reba data. Cai olon ga ngaok tau terus poli hitu bete kaeng kilo, behas wina rona. Poli behas hitu ngoeng kawing kole. Pande hitu one anak taung rasan, mose dise hindi haes. (kanis jehola)

Penulis: Kanis Jehola
Editor: Kanis Jehola
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved