Tai Emas

MANGA ca keluarga one ca beo. Keluarga hitu manga telu anakn, ata rona taungs. Ata ngaso ngasangn Teus, anak te suan ngasangn Remus, anak te telun ata cucu ngasangn Edus.
Iru pu'ung cekeng, kraeng tua teno keboro  sanggen taung weki one beo, ai kudut bagi lodok uma ga. Hi Teus, Remus agu Edus kole ngo keboro hitu ai kudut tiba lodok kole ise. Ai ise te telu anak reba taungs ga. Nganceng taungs ciwal uma.
Cai du leso pati lodok, Teus, Remus agu hi Edus kole ngos. Ise te telu tiba lodok cimping taus. Hi Teus anak ngaso delek one wanang, hi Remus one reha, agu hi Edus one cupu leo.
Nenggitu kudu pu'ung rimu dise uma ga, mai ca tekur. Tekur hitu cai one uma de Teus tegi kudu ceba ruisy. Nggo'o taen: "O... Teus Teus a ta'i tangging no'o aku wag, cio cinggong no'o aku wag." Mai wale de Teus, "O... neka e..."
Ali benang li Teus, tekur hitu lelap ngo one uma de Remus tegi kudu ceba ruis kole. "O... Remus Remus a ta'i tangging no'o aku wag, cio  cinggong no'o aku wag." Mai wale de Remus kole, "O... neka e..."
Ali benang kole uman hi Remus, tekur hitu lelap kole ngo one uma de Edus kudu tegi ceba ruis. "O... Edus Edus a ta'i tangging no'o aku wag, cio cinggong no'o aku wag." Mai wale de Edus ga, "O... com ta'ih ma."
Woko poli wale sendo kaut li Edus e.. tekur hitu ta'i tu'ung. Du poli ta'in tekur hitu, ngo lelo lise Edus. Kali ata keluar one mai tuka de tekur hitu toe te ta'i tuung, kaling ko emas. Ali ita emas hitu hi Edus langsung tekar senang. Pu'ung nitu main hi Edus jadi ata bora mese. Eme ise Teus agu Remus wi kali ga menyesal tu'ung. Ise cemburu laing agu hi Edus.
Hitu tombo dise ende agu ema danong du areng toko remeng koe ye ite. Toe baen ga tu'ung ko co'oy tombo hitu. Landing eme nuk lite tombo hitu e.. toe wolengn agu wintuk dite te uwa weru ho'o. Ai ite te uwa weru ho'o eme bergaul poro lelo atan. Ata bora bergaul agu cama ata bora kali. Eme mai lejong ata bora ko tuang mese, itu po tiba di'a. Landing eme ata mai one mbaru dite ata kasi asi, ko rasa toe cama agu ite, ite toe tiba di'a. Emak toe teing wae kolang koley. Ite toe pernah pikir ise situ kole manusia cama agu ite. Emak ise situ ata kasi asi te ba rejeki latang iten.
Sifat dite te uwa weru kole, eme manga ata boran baling mai ite, ko ase ka'e dite irihati laing. Toe bo te usaha kerja ga, pas nga te nes atas situ te di'a mosed. Manga kole iwon sampe janto pake mbeko. (kanis jehola)