Semua Bagatal
Sonde ada tanda apa-apa ma hanya badan dong yang bagatal samua.
Penulis: PosKupang | Editor: Sipri Seko
AMA Tobo bagaruk kiri kanan dari bawa sampe atas. Su dua hari ni Ama Tobo badan dong bagatal samua. Orang bilang kaskaduk ma ini sonde. Sonde ada tanda apa-apa ma hanya badan dong yang bagatal samua.
Ama Tobo su minum CTM deng amocsilin ma sonde berubah ju. Tetap bagatal. Ina Feok su maruak sa! Ko ais, Ama Tobo bagaruk son liat tampat na. Di mana sa, kalo su gatal, bapatua bagaruk na. Di orang banyak ju bapatua su malasa tau sa.
"Lu ni jang sampe orang taro lelhanak di pakean dong. Mandi pake aer panas ko tatobi ju lu pung bagatal ni son tau ukur. Lu jang kaluar rumah e. Bagatal na kaluar ko kana angin na tamba foe," Ina Feok su mulai larang sang Ama Tobo.
Ama Tobo kakodok stenga mati. Ini mungkin karena aer di perigi yang kamomos. Kemaren dolo waktu ujan, aer masok dalam sumur ko pono deng lompor. Mungkin itu yang bekin Ama Tobo badan bagatal. Balom lae waktu pi pasar sana, katoran dong ponu sampe di atas jalan. Kamomos mati. Bau sa ke orang taro bangke di situ na.
"Itu mungkin karena kebiasaan sa. Co kalo orang pasar dong sonde sembarang buang katoran, beta yakin pasti sonde kamomos bagini. Ma kalo su ujan bagini, bukan dong sa yang kena te kitong samua rasa na. Pemerintah dong kermana ni," Ama Tobo omong ma bagaruk tarus.
Ina Feok mau marah ma kasian sang Ama Tobo. Bagitu ma dia pung laki aa. Makanya Ina Feok ame minyak aruda ko gosok di Ama Tobo. Ama Tobo yang rasa agak enak, mulai mangantok. Soalnya tadi malam sonde bisa tidor na. Bagaruk sampe pagi. Ma Ina Feok sonde mau tau.
"Ama ee. Ais ini na lu tolong kas barisi ame itu got deng kandang babi ee. Biar ko kalo ujan na aer kotor jang mangalir pi parigi lai to. Kalo kitong kas tenga bagitu sa, nanti badan bagatal tarus. Su rasa to, gatal lebe dari pake lelhanak na."
Ama Tobo sonde bisa omong banyak lai. Mau tidor sonde jadi. Dari pada tidor, besok badan bagatal lai karena balom kas barisi rumah na. **
