Lempar Batu Sambunyi Tangan
KALO barani barbuat harus barani bartanggung jawab. Jang su barbuat, kas tasala orang laen. Itu sama ke orang biasa bilang, su balempar batu, mo sambunyi tangan. Kalo perilaku bagitu, orang bilang pangecut deng panau bebek. Jang hanya mo bacari kambing hitam sa.
"Ente tau ko sonde bet pung maksod. Kalo ente parna sakolah, biar Es De sond tamat, pasti ente mangarti. Ko itu kata-kata dia pung arti talalu gampang. Beta bilang, talalu ketek," Ama Tobo kastau Ama Jola.
Dangar Ama Tobo batanya, Ama Jola pung kulit testa mengkarut. Dalam hati, tua bapikir itu kata pung arti. Tua pung tangan mulai bagarok kapala. Padhal sond bagatal. Lia Ama Jola pung tingka, Ama Tobo langsong togor. "Su kanapa lai, ko ente bar abis mandi. Tadi beta lia ente mandi pake sampo. Karmana ente pung kapala bisa bagatal?"
"Mo bagatal ko sonde, beta pung urusan. Kanapa ente mas barepot. Ente pung kalakuan biasa suka buat orang kakodok. Kalo sond bagitu, artinya bukan namanya Ama Tobo. Beta mo kastau sang lu. Beta sakola Es De sond tamat, tapi ente jang talalu anggap enteng deng beta," Ama Jola su mulai nae dara.
"Kawan, beta sond ada maksod bagitu. Katong dua su biasa bacarita deng baganggu. Kanapa ini hari kawan bisa emos bagini. Bet minta maaf ooo. Beta sond ada maksud mo baganggu sang lu," Ama Tobo kastau Ama Jola.
Dangar panjalasan Ama Tobo, Ama Jola pung emosi su bakurang. Bagini kawan, Ama Jola mulai baomong. "Bet su baulang kali kastau sang lu. Beta sakolah hanya sampe kalas dua eS De sa. Bet sond sama ke lu, sakolah tamat SMA. Jadi kalo ente baomong ke tadi, beta sond mangarti. Makanya beta pung testa bakarut."
"Bet hanya mo kastau sang lu. Biasanya, orang sakola tinggi pung tingka ada yang tukang baputar bale kata-kata deng fakta-fakta. Ko pung cara putar bale, biar orang buat banar bisa jadi salah.
Deng kalo orang buat salah, dong bisa buat jadi banar na. Dong pung pikiran memang pintar mo mati. Tapi dong son punya hati nurani lai. Gar-gara talalu pintar, orang kacil jadi korban," Ama Jola kas jalas Ama Tobo.
"Kanapa ente baomong bagitu," Ama Tobo tanya bale Ama Jola. "Lu rasa to. Tadi lu pung kata-kata mo putar bale sang beta. Sakarang kanapa ente batanya sang beta. Ko bilang ente sakola tinggi. Kanapa ente sond mangarti. Makanya, jang talalu baolok. Sakarang kana batu to."
"Ente jawab beta pung partanyaan dolo," Ama Tobo ke rasa balom puas batanya lai.
"Bagini kawan, katong idop di dunia ni talalu banyak parsoalan. Jadi kalo katong ada buat salah, jang manyangkal. Katong masti barani bilang kalo salah bilang salah. Jang karna gengsi deng karna malu sa. Katong su salah mo partahankan, bilang katong banar. Lebeh parah lai su bagitu katong kas tasala orang laen. Padhal orang laen sond salah." (reddy ngera)
