Tapaleuk Katong Musti pi Maloi Terus

POS-KUPANG.COM--Su maso musim hujan bagini, Ama Tobo su susah kalo mo ojek. Su mo satu minggu dia stres karna satu hari hanya dapat dua ato tiga penumpang, andia ko ini hari dia di rumah sa.

"Ama karmana lu su berapa hari ojek ju son betul. Lebe bae lu bantu buat kue ko bajual," Ina Feok bangun ko tanya dia pung laki.

Tobo hanya diam sa, dia ada duduk di depan rumah pegang kaca spion ko cabut-cabut dia pung jenggot.

Ina Feok ju punya kue laku karna hujan bagini orang di pasar dong lapar tarus.

Ama Tobo dalam hati, kalo dia son kaluar ko ojek pasti mamtua paksa bantu buat kue ko jual separuh di rumah.

Kalo jual di rumah berarti dia son bisa bajalan deng Bai Ndu.

"Ina,ini hari beta pung langganan su janji jemput jadi beta son bisa bantu," Tobo mulai akal dia pung bini.

Ina Feok kalo dengar‎ alasan bagitu dia son suru lai karna biasa Tobo omong batul na.

Ina Feok langsung keluar pi jalan ko naek bemo pi pasar.

Pas Ina Feok jalan,seperti biasa,Bai Ndu su muncul di Tobo pung muka ko senyum-senyum.

"Lu kanapa ko datang dar jaoh su senyum-senyum sama ke orang dapa KP sa,"Tobo togor Bai Ndu.

Bai Ndu sonde nodek te dia langsung maso ko duduk dekat Tobo. Tobo balom pake baju te dia baru abis mandi.

"Pas su, beta datang lu su mandi, berarti katong su bisa jalan," Bai Ndu pangku kaki goyang-goyang.

‎Ternyata dong dua su bajanji mo pi karoke di pub dekat KD sana. Dong dua pi siang-siang supaya mo liat suasana di lokasi KD.

"Katong pi jam bagini pas karna, beta ada dengar pemerenta su tutup ma masih ada orang yang masok di sana. Katong dua pi liat coba jang sampe pemerenta dong ju akal-akal sa," Bai Ndu omong deng semangat .