Pante Wisata Lasiana Kot Kupang Pung Garsang

Laporan Wartawan Pos Kupang.Com, Ferry Ndoen

PANTE wisata Lasiana, di Kelurahan Lasiana, Kot Kupang terliat su di tata baek. Tapi anenya in wisatawan dong ko son beta berlama lama di pante wisata yang jadi ikon masarakat di Kot Kupang.

Bai Ndu mulai babahas ame topik yang hangat di barita kota di harian Pos Kupang, koran terpecaya masarakat eN Te Te.

"Itu su... bet ju heran... orang datang piknik dan berwisata di Pante Lasiana tapi ko son tahan lama-lama. Beta rasa ada beberapa kekurangan yang musti dibenahi pengelola ato pemilik objek wisata. Sala satunya, ini lokasi pante masi kurang sajuk ato masi panas," kata Bai Ndu.

Ina Feok yang dengar dari tadi Bai Ndu pung baomong ju ikut satuju.

"Bet satuju lu pung pandapat. Memang Pante Wisata Lasiana musti ditanam lebe banyak pohon ko biar agak sajuk. Musti tanam pohon besar yang bisa jadi perindang, seperti pohon baringin ato tanam ever green biar ko hijo. Bet liat ini pengelola dong cum bis atarima doiii... masok pengunjung tapi son parna berpikir lebi untuk kas ijon itu area hingga ke pesisir Pante Lasiana," kata Ina Feok.

Bai Ndu cum angguk kapala dengar ame Ina Feok pung baomong.
"Lu kalo baomong boleee sa... bet jempol... mulu atas kalo carewet pasti mulu bawa ju ikot carewet.. Coba kalo omong tu na fokus," kata Bai Ndu.

Ina Feok yang dengar Bai Ndu pung baomong soal mulu atas bawa dia agak takuju.

"Aiihh. lu pung porno lai... baomong soal pante tapi lua su masok sampe mulu atas dan mulut bawa.... ini su son banar laiii. Inga kalo baomong na jang ngalur ngidul ko sambarang sa," kata Ina Feok kas inga sam Bai Ndu.

Bai Ndu dengar Ina Feok mara.... dia jadi takuju deng su mulai baomong kambali fokus.

"Betulll... eee katong tadi baomong soal pante wisata Lasiana yang karing dan kurang sajuk akibat kurang pohon perindang... tapi beta su gagal fokus ko pinda fokus baomong soal mulut atas carewet pasti mulu bawa ju ikot carewet... Bet rasa batul...

katong musti kas inga pengelola pante lasiana ko inga batanam anakan pohon di musim hujan in.... biar ko tiga ampat taon mandatang, it lokasi su rindang dan sajuk ko biar wisatawan jadi betahh berlama lama dudu di lokasi pante wisata Lasiana," kata Bai Ndu. (ferry ndoen)