Baca tanpa iklan
Laporan Wartawan Pos-Kupang.Com, Ferry Ndoen
POS-KUPANG.COM - Sahabat kuliner ntt yangberbahagia, dulu saat katong masih kici, kalo katong bermaen gila katong su maki ato bilang sam teman lu pung biji tuh.
Ini sapaa akrab anak tempoe doeloe saat asyik bermain dan bertegur sapa antar sesama kawan bermain kalo ada ba tasala.
Memang konotasi bi di sini nih...kurang bae. Karna kalo sedang marah pasti katong su bamaki deng kata agak kasar.
Tapi biji di sini masih dalam nuansa persahabatan saat masa kici katong bermaen di kampung.
Na skarang nih su beruba jadi desa, lalu su jadi kelurahan.
Kalo dulu katong masih bermaen ba fiti pake tali sice.
Makanya, katong pu kursi plastik di rumah yang dolu masi pake tali sice suka katong potong.
Kalo kursi tali sice su tagantong dan su putus, katong su mulai potong kicici kici ko pi mae a fiti.
Nanti katong pi cari kayu cabang yang bae lalu katong ikat deng karet untuk pi bermaen ba fiti.
Juga katong dolu masi bermaen kucing kaleng. Ini permainan sangat asyik karna maen ba samunyi.
Nanti katong pisambunyi di belakang pohon asam ato pohon tamring.
Ada yang lari joahhh... pi sambunyi di pohon kapuk. Lalu, kawan laen nanti sambunyi dekat kaleng.
Sapa yang bisa kembali pi pegang kaleng tanpa bisa ditebak maka di lolos.
Tapi sapa yang datang pegang kaleng tapi kena tebakan maka dia pung jadi.
Dia pung bertugas laiii... pi cari kawan yang sambunyi di belakang pohon.
Juga katong bermain gala asin, katong barmaen ba lari sampe ini kaki dong ba abu.
Apalaiii... kalo saat bulan tarang ato bulan purnama, pasti katong barmaen sampe tenga malam, sampe ini kaki dong ba abu.
Nanti pulang rumahhh.... katong bapa su tunggu deng kope rim di muka rumah.
Saat katong masok rumah, katong pung su kabas ame katong deng kopel rim ato deng gaga sapu ato deng sapu lidi.
Ini karna katong sonde pulang mandi dan barmaen sampe tunga malam dan pulang deng kaki ba abu.
Kada kalo su kana pukul deng kope rim, katong langsung lari naek tampa tidor ko manangis.
Ini tanpa tidor ju masih terbuat dari besi jadi kuat mo mati sa....
Katong ju tidor di kasur kapok dan bukan dari spring bed.
Satu kamar katong bisa tidor sampa 3-5 anak. APalai lae tanpa tidor susun ato tampa tidir besi ukuran besar.
Kalo musim dingin katong pake salimut.
Ini samua kanangan indah sonde terlupakan saat indah di masa kici.
Tapi kalo omong soa lu pung biji, beta cum mo kasih info soal ikan biji nangka yang di jual di TPI Oeba.
Harga ikan biji nangka satu ekor ada yang Rp 25.000 tapi ada yang 1 ekor 40.000. Tergantung ukuran ikan .
Ikan bisa di beli di Tempat Pelelangan Ikan (TPI) Oeba, di Kelurahan Fatubesi, Kecamatan Kota Lama, Kota Kupang.
Ini ikan biji nangka lebe enak kalo bisa ikan kuah asam ato ju di goreng.
Selamat menikmati berkat Tuhan, ikan Biji Nangka (penulis Ferry Ndoen).
Baca juga: Kuliner NTT, Karbohidrat Beras Kurangi di Usia 50-an, Ini Harga Beras Mol Osao di Pasar Oeba Kupang
Ikuti Pos-Kupang.Com di GOOGLE NEWS
TPI OEBA - Suasana di TPI Oeba, Kecamatan Kota Lama, Kota Kupang.