Baca tanpa iklan
Laporan Wartawan Pos Kupang.Com, Ferry Ndoen
POS-KUPANG.COM - Sahabat kuliner ntt, ikan jenis ini sonde dijual di pasar di Kota Surabaya, ato di Kota Malang, ato di Sidoarjo Provinsi Jawa Timur sekalipun.
Ikan jenis ini cum ada di TPI Pasar Oeba, Kelurahan Fatubesi, Kecamatan Kota Lama, Kota Kupang.
Ini ikan pung nama sahabat kuliner ntt, orang Kupang bilang ikan Parang Parang.
Ikan jenis ini enak mo mati su abis goreng pake garam deng sadikit geprek bawang puti.
ikan parang parang kalo makan deng nasi panas enak momati saaa....
Kalo omong soal bumbu, untuk goreng ikan samua sama saaa... sepert goreng ikan lainnya.
Baca juga: Kuliner NTT, Kacang Legit Nona Timor vs Kopi Harum Robusta Nona Bajawa - Flores vs Pisang Goreng
Tapi karena beta pi Pasar Oeba Kota Kupang dan beli ame ikan Parang Parang, maka ini ikan ada pung carita.
Jenis ikan Parang Parang waktu beta masih duduk di bangku SMP kelas 2, SMPK Frater Kupang sekitar taon 1982, beta pernah pi tangkap ikan Parang Parang.
Waktu itu taon 1982, beta tinggal deng beta pung kaka, Ir. Nikolas Ndoen, Alm di Kelurahan Oesapa.
Beta pung kaka waktu itu karja di Dinkes Kupang. Jadi waktu, itu karena beta tinggal di Oespa, ada tetangga namanya To'o Aten Costa (alm).
Dia ajak beta pi naekk bagan di depan perairan Oesapa, dekat deng Pulau Kera,masih dalam perairan Teluk Kupang.
Waktu itu, bagan ikan nelayan Oesapa milik orang Bugis di Oesapa.
Untuk penerangan di atas bagan atau perahu bagan kitong masih pake lampu strongking. Ini lampu jadul.
kasih nyala strongking pake minyak tana, dan bakar untuk umpan pake spritus.
Lampu strongking kitong bakar di empat penjuru sisi bagan.
Nanti su manyala terang, ikan mulai bermaian di bawah lampu di atas waring bagan.
Nanti su amper siang ato subuh, ikan main banyak yang main dekat lampu strongking.
Biasanya kalo bulan bagini yang paleng banyak ikan kombong, ikan tembang dan ikan parang parang.
Nanti ikan kalo su banyak kumpul, kitong mulai tarik su tali waring bagan pelan pelan,
Nanti ikan yang ada di atas waring bagan terperangkap dalam waring.
Ini ikan yang kitong cedok ko kumpul. Tapi ini ikan masih super segar. Sonde kena formalin.
Kalo ikan skarang dong selain pake es, tapi simpan di cool box dong taru ju deng formalin,.
Ini yang sangat bahaya pake pengawet formalin untuk awetkan jenaza manusia.
Nanti kalo ikan su takumpul di dalam box ikan, kitong bawa pi darat pake perahu dayung kici an ato perahu ketinting ke pesisir pante Oesapa.
Jenis ikan parang parang ini nanti kitong jual di Pantai Oesapa. satu kumpul ikan di jual dengan harga Rp 500 ato Rp 1000 per kumpul.
Beta naek bagan ikan, kalo malam hari di laut pung dingin laiiiii....
Biasanya, kitong bawa deng arang dan minyak tanah. Nanti di atas bagan kitong buat bara api ko bakar ikan yang masih segar ko makan deng nasi dan sambal tarasi.
Sekaligus bakar api arang untuk bikin hangat badan yang kediinginan di atas bagan
Nanti kalo su turun dari bagan, ikan kitong bawa pulang separu,
biasanya dong kasih kitong ikan satu baskom untuk ikan makan, dan lainnya kitong jual di pinggir Pante Oesapa.
Ikan kombong kalo bawa pulang, biasanya kitong biking ikan kuah asam.
Cuma cemplung asam/tamring lalu taruh ikan kombong su biking ikan kua sam dan makan deng nasi panas panas.
Kalo ikan Parang Parang, biasanya kitong goreng ko makan deng nasi panas dan sambal tarasi ato sambal tomat.
Tapi kalo musim ikan sardin, biasanya kitong bikin ikan lawar ato ikan sardin goreng tepung.
Ini pengalaman waktu beta masih duduk d bangku SMPK Frater dan beta tinggal dibeta pung kaka di Kelurahan Oesapa Kota Kupang.
Jadi ada banyak pengalaman dan carita menarik kitong yang masuk era ato zaman jadul.
Kalo anak anak milenial skarang, tinggal pangku kaki kow dong teriak minta makan orangtua.
Su ada makanan di meja, dong maih teriak kow minta lai pi beli makan di warung.
Apalai anak-anak sakarang paleng suk amakan nasi goreng, ayam geprek yang samua cuma rasa vitsin tinggi.
Padahal dong pung bapa mama ada simpan ayam di kulkas, ada telor ko bisa goreng.
Tapi dong tetap mau dan minta yang instan. Biar su ada lauk masih minta pi beli di warung.
karena ini warung dong ju pake pelaris makanan, jadi kalo anak-anak melenial sonde makan makan warung, dong akan gelisah dan sonde bisa tidorrr...
Ini samua pengalaman pribadi yang kitong orangtua yang su kapala 50 - an yang kitong ini alami dan jadi kenangan dan catatan sejarah hidup
APalai kiton yang lahir taon 1960-an masihm ain gala asin, siki doka,main kayu do'i, main petak umpat, mai ba fiti, main kucing kaleng, main lempar gambar.
Beda deng anak anak milenial zaman now. Sakarang samu cum tondok kow main HP, main game.
Dong bardoa main game dari pagi sampe malam. apalaiii kalo hari libur, dong main game di sofa ruang tamu dari pagi sampe malam hari.
Selamat menikmati berkat Tuhan ikan parang parang goreng garing ala Ferry Ndoen, Sabtu 29 april 2023. (fen)
Ikuti Pos-Kupang.Com di GOOGLE NEWS