Kuliner NTT, Susu Sapi Asli Segar di Jual Rp 500 per Botol Bir, Kisah Isap Susu Mama Sampe 4 Tahun

Laporan Wartawan Pos-Kupang.Com, Ferry Ndoen

POS-KUPANG.COM - Sahabat kuliner ntt yang berhagia, beta mau bercerita tentang kisah dolu dolu saat kitong masih kici.

Omong soal kisah masa kici, beta teringat lagu saat beta masih kici dan masih sakola minggu.

Lirik lagunya berbunyi....waktu ku Kecil Hidop senang sekali, mama piara bae bae.

Sesudah besar tertindih oleh dosa.... jiwa melayang ke neraka .. adohhh kasihan...

Tapi ini cuma bait lagu yang kitong ingat saat masa kici. Namun sebenarnya, beta inga saat masi kici, kitong cum bermain dan pi sakola.

Hidop terasa sonde ada beban, masi maen permainan zaman dulu ato permainan jadul.

Ada permainan kucing kaleng, ada permainan gala asin, maen ba fiti, maen siki doka, maen lompat karet.

Skarang ampe ini samua permainan sonde ada lae yang dimainkan anak-anak skarang.

Samua anak anak zaman now cuma tonndookk kow maen HP, dari kici sampe tua sama.

Yang tua ju sonde inga ana lae... ko cum tondok maen HP.

Kalo dolu ju kitong tidor masih di kasus kapukkk dan bukan di spring bed seperti skarang ini.

Beta inga... dolu masih ada rokok komodore yang di jual di Pasar Kampung Solor, di Jalan Siliwangi di Kupang. Balom ada Pemkot ato wilayah  Kupang.

Dan di depan beta pung ruma di Kam To Kiss ato Kampung Tode Kisar,skarang su jadi Kelurahan Tode Kisar.

Dolu tuh... di depan kitong pung rumah gangnya masih jalan babatu, belum di aspal lapen.

Tiap pagi ada orang Timor deng cum pake kaen khas adat Timor yang jalan depan rumah ko bajual ame ini susu sapi segar hasil perahan dari sapi Timor.

Beta pung mami, biasa beli ame satu ato dua botol susu sapi segar dari mata susu sapi Timor.

Ini perahan susu dong bawa dari pingiran  Kupang lalu di jual di gang di Kupang.

satu 1botol susu sapi  segar dong jual Rp 500 dan beta pung mami biasa beli ame dua botol ko kasi kitong minum.

Weehhh rasa ini susu sapi perahan dari mata susu sapi Timor biking kitong pung lida mo gilaa sa.

Omong soal susu sapi asili dan susu segar perahan sapi, beta pung anak dong isap dong pung mama pung susu sampe dong usia 4 taon baro dong sole.

Padahal anjuran dokter usia bayi ato anak soleh isap susu 2 taon.... tapi beta pung anak kandung dong soleh isap dong pung mamam pung susu saat usia 4 taon.

Ini yang bikin dong jadi pintah dan sonde stunting, dan terbukti beta pung anak kandung tumbuh sehat dan normal, sakolah dan dan su berhasil.

Beta pung anak pertama ato anak sulung su tamat sarjana teknik sipil FST Undana dan su karja di PLN Wilayah Kendari, Provinsi Sultra.

Dan betap pung anak nomor 2 su tamat sarjana akuntansi (S.Ak) Undana IPK 3,45 dan su karja di # Bank Christa Jaya# Kupang.

Dan bet pung anak nomor 3 pemerintah su kasi sakolah deng biaya pemerinta di #SMA Taruna Nusantara# di Magelang .

Dan si bungsu sa yang sakarang masih harus beta perhatikan dan sakola di SMP Kristen Lentera Harapan Kupang duduk di klas 1.

Ini samua dong tete di dong pung mama sampe dong umur ato usia 4 taon.

Jadi dong pintar dan sonde stunting.Jadi nona muda dong yang su siap mo nikah  na jang lupa kasi susu anak minimal sampe 2 taon.

Parcaya sa beta pung mulutttt..., pasti dong sonde stunting. Bahkan dong akan jadi anak yang cerdas dan super pintar.

Dan yang pasti kitong sonde kasihhhkaluarr doi untuk pi beli susu bayi. Ini penghematan selama 4 taon.

Apalai beta pung maitua paleng rajin dan suka makan kelor waktu hamil, awiiii  beta pung anak dong di wisuda samua deng IPK di atas  3 koma.

Makannya waktu dong kasihmasok lamaran, di PLN dan di Bank ..Puji Tuhan samua lulus dan diterima.

Jadi ini kisah dibalik minum susu sapi asli segar Timor waktu beta masi kici... harga jua masih murah cuma Rp 500 pr botol bir.

Ini susu sapi Timor benar goyang ame kitong pung lida dan masi kitong inga sampe skarang dan kitong ju su masok masa tua... dan kitong bapa mama samua dan orangtua dolu samua dong su jadi almarhum. 

Selamat menikmati berkat Tuhan ala Ferry Ndoen, GBU Senin 29 Mei 2023.(fen).

Ikuti Pos-Kupang.Com di GOOGLE NEWS

Baca juga: Video Viral TikTok, Neng Geulis Bibir Imut Imut Berburu Sarapan Pagi,Sarapan di Cilaki