Tapaleuk: Jang Manghayal

Tapaleuk: Jang Manghayal

POS-KUPANG - Ama Tobo son tau ada mimpi apa tadi malam, bangun deng bangun baptua su mandi barisi deng pake pakian rapi mamati. 

Ina Feok heran lia dia pung laki yang papagi buta su bangun ko ba stel rapi mati. "Lu ada mimpi apa ni ko jam bagini su rapi sa, " tanya mamtua pas lia Ama Tobo ada ika sapatu. 

"Lu dudu diam sa diruma beta sakarang mau putar stir ko bisnis sa te tadi malam b ada mimpi bae, " baptua jawab abis langsung angka motor ko gas jalan. 

Ina Feok ju langsung manuju kabun ko pi ketu marungga siap kas baptua makan siang. 

Baca juga: Siqvrid Basuki Minta Pengelolaan Dana PEM Harus Beri Dampak Bagi Ekonomi Masyarakat

Son sampe satu jam Ama Tobo su bale kambali rumah deng muka son batul sama ke orang bar abis kala judi. 

Ina Feok su tahan katawa sa gargara lia Ama Tobo pung muka yang su sonde batul lai, te baptua sampe deng sampe langsung buka buang sapatu dong sa ko tasiram di dalam kamar. 

"Hae ko bilang na mau jadi pebisnis, pebisnis apa ni ko yang baru jam bagini su bale rumah, " mamtua tanya deng nada sirik. 

Tarakir baptua mangaku kalo bar bale dari kantor lurah mau pi pinjam dana PEM ko mau beking usaha  ayam potong. 

Baca juga:  Angkasa Pura I Layani 9,7 Juta Penumpang di Triwulan I 2022 

"Tau le tadi be pi sampe sana itu orang di kantor lurah kastau kalo balom bisa pinjam sakarang karna banyak orang yang pinjam dan balom ganti. Tau ini salah di pamarintah ko di orang dong yang pinjam ma sonde sadar untuk ganti itu doi tarakhir katong yang baru mau pinjam sonde bisa," 

Dengar baptua pung carita Ina Feok langsung sambar deng katawa "makanya jang manghayal lebae lu pi balakang pi kas makan itu ana babi dong ko nanti katong bisa jual, " (Berto Kalu).