Breaking News:

TAPALEUK : Ana Lulus Polisi

Takuju mau bayar ini itu, kitong ame doe dari mana. Lebe bae kerja bantu bapa di kobong sa.

Penulis: Sipri Seko | Editor: Sipri Seko
ILUSTRASI/POS KUPANG
Tapaleuk Pos Kupang 

AMA Tobo aer mata taduduk. Antara percaya deng sonde, tapi ini benar-benar kenyataan. Itu kapan baitua mengamok sang anak laki karena mau iko tes polisi.

"Lu kitong doe di mana. Makan minum sa ada susah stengah mati, lu mau pi iko tes lai. Takuju mau bayar ini itu, kitong ame doe dari mana. Lebe bae kerja bantu bapa di kobong sa."

Tapi itu anak sonde toe. Baitua diam-diam urus surat ko pi iko tes. Pas kemarin pengumuman, Ama Tobo amper sonde percaya. Dia pung anak, dia sonde kaluar satu sen ju ma lulus. Bilang dia pung nilai talalu bagus. Kesehatan paling top. Sonde ada noda sama sekali.

"Lu su jadi polisi ko anak. Bapa titip pesan, kerja bae-bae. Sonde gampang jadi polisi. Harus jaga masrakat pung hati. Jang bikin dong kecewa. Lu akan maso sorga kalu kerja lurus anak."

Ini anak su mau mati sa liat Ama Tobo pung muka kasian. Ina Feok laen lai. Mamtua su mulu gram kuliling kampung. Semua orang su tau kalo dong pung anak satu biji lulus polisi.

"Ini baru batul. Ternyata selama ini orang omong tu tipu. Ada yang bilang mus bayar mahal baru bisa jadi. Ko ini anak doe satu sen ju sonde kalua ma su lulus. Ada lai yang bilang itu anak petani satu dari Sumba lulus sekolah perwira. Pak Kapolda tarima kasih banyak oo."

Ina Feok omong ke ada kenal kapolda sa. Ama Tobo mau olok mamtua ma sonde enak. Hati lai babunga na. **

Ikuti kami di
KOMENTAR

BERITA TERKINI

© 2021 TRIBUNnews.com Network,a subsidiary of KG Media.
All Right Reserved