Berita Tapaleuk

Tapaleuk : Katong pi Open House

Ina Feok sonde ame pusing, dia hanya diam ko langsung masok pi dalam rumah. Dia barenti cape ko langsung pi bamasak .

Tapaleuk : Katong pi Open House
GRAFIS POS KUPANG/TYA MEOK
ilustrasi 

POS-KUPANG.COM--Ina Feok masih bajual di pasar ma andia,sakarang dia pung kue su kurang laku. Soalnya,sakarang orang banyak su jual kue Natal na.

"Ina kenapa lu pulang su sore bagini. Besok kalo bagini lu jang pulang sa," Ama Tobo tao foe apa ko mangomel dia pung maitua.

Ina Feok sonde ame pusing, dia hanya diam ko langsung masok pi dalam rumah. Dia barenti cape ko langsung pi bamasak .

‎Ama Tobo dia marah karna dia su lapar, waktu pulang ojek sonde ada makanan andia ko dia tensi naek.

"Ama kenapa lu pung muka sama ke orang baru abis minum moke," Bai Ndu su muncul di Tobo pung muka.
Ama Tobo sengaja son dengar ko dia ada pangku kaki diam-diam.

Bai Ndu su tao kalo Tobo model bagitu pasti ada koslet deng dia pung maitu.

"Ama e, sakarang orang ram$e buat kue natal. Hanya itu su, katong sakarang lama-lama sonde bamasak lai ko hanya makan kue sa," Bai Ndu mulai omong soal jalan

Ama Tobo dengar dia langsung balek muka pi Bai Ndu karna dia juga senang karna son lama lai su mo kunci taon.baptua ada tunggu ko pesta.

"Itu su ama,beta pung mao kalo pemerenta dong ada open house na undang katong ju ko pi .tao ini taon ada pesta rakyat ko sonde" Ama Tobo semangat mati pung.

Ina Feok yang muncul bawa kopi kas dong dua langsung dudu juga ko dengar. "Ama batul ko ini beta baru pulang dar pasar karna musti sabar te kue su talalu tapoa di pasar sana," Ina Feok omong bagitu ko dia pung laki dengar, kalo dia pulang terlambat karna kue balom laku.

"Na ko beta ada dengar pemerenta mo open house pas Natal. Mudah-mudahan katong bisa pi iko," ‎Bai Ndu sambung Ina Feok.

"Bosong dua omong ma andia kalo katong son dapa undang na mo pi bikin apa.Basong tao ko sonde kalo mo tutup taon ato Natal biasa ada Open House jadi katong harus ko selamat katong pung pemerentah," Ama Tobo bangun ko ame tembako makan kas Bai Ndu. (oby lewanmeru)

Penulis: Oby Lewanmeru
Editor: Rosalina Woso
Sumber: Pos Kupang
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved