Tapaleuk : Katong Sonde Aman Bajalan

Laporan Reporter POS KUPANG.COM, Oby Lewanmeru

POS-KUPANG.COM--Ina Feok deng dia pung laki mas pagi-pagi buta su batasibu. Ina Feok balom turun dar tampa tidor ma mamtua su boto-boto karna dar kamarin dia punya langganan kangkung di pasar son ada. Padahal ada utang andia ko balom bayar.

"Kanapa ko itu langganan sonde pi pasar jang sampe dia sakit ko atau dia pung rumah makan tutup andia ko son beli sayur," Ama Tobo ‎tanya dia pung bini.

‎Ina Feok balom turun dar tampa tidor ju. Ama Tobo ju su pemalas ko dar tadi hanya omong utang tarus.
Son lama dia su kaluar te orang ada antar koran di luar.

Ama Tobo masok kambali bawa itu koran ko mo baca. Dia biasa suka baca tapaleuk ju biar ada dia pung nama ju dia tiap hari bangga karna kaluar tarus di koran.

‎"Ama e katong ada baomong supaya ator bae-bae katong pung hidop supaya jang Talalu bautang lai, ma andia lu son mo dengar beta na," Ina Feok mengeluh tarus.

Dong dua masi basambung suara te, Bai Ndu su aria-aria pelan-pelan dari atas gunung ko dar jao dia ke senyum-senyum.

"Basong dua ni tiap hari su sama ke orang maen sinetron.‎ Kenapa ko baribut son ada ujung pohon," Bai Ndu su omomg ke mo nasehat dong dua.

Pas Bai Ndu su masok, Ama Tobo masi terus

‎Baca dia pung koran, te baca kana bilang sakarang jalan dalam kota kupang harus hati-hati.

"Itu beta su biilang, katong musti hati-hati te sakarang ada orang tukang begal . Katong jalan sandiri na dong tahan katong minta uang," Bai Ndu omong lai.

Ina Feok yang dengar, dia langsung bangun karna dia tasdi mo omong soal begal ma dia son tao. Ama e ini katong pung kota sakarang su ke son aman lai. Tao ini pemerentah dong ada tao ko sonde," Ina Feok su duduk di Ama Tobo pung samping. (*)