Pegawe Barmaen Judi

Laporan wartawan Pos Kupang.Com, Ferry Ndoen

BAI Ndu mulu komat komit son jalas.... dia tarus sa baboto tapi ara dan tujuan dia baboto soal apa ju son tau.

Ina Feok maskin dudu rapat ko dengar ame apa sa yang Bai Ndu sedang boboto sambil mama siri deng lua aer mera di mulut tapi tarus komat-kamit.

"Bet liat dari tadi lu pung mulut tarus sa komat-kamit so jalas..... kalo mo baomong na baomong.... jang cum baomong tapi suara dalam mulut jadi son jalas," kata Ina Feok kas inga sam Bai Ndu yang tarus baboto.

Beta baboboto karna dari tadi beta baca ame di kora Pos Kupang ada pegawe ato yang skarang pamarinta su ganti istila tamba kereeennn.. aparatus sipil nagara ada kana tangkap barmain judi di teras ruma sala satu kapala dinas di Jalan Bakti Karang, Oebobo, Kota Kupang.

"Kalo beta rasa maen karna untuk kas ilang rasa mangantok ato rasa januh.... itu biasa... Ato kalo barmaen karto sambil jepit talinga supaya mata tarang jua itu biasa... orang hidup harus barmaen... maen apa sa yang panting jang sampe melanggar atoran sperti barmaen kartu taruhan doiiii...," kata Ina Feok.
Bai Ndu ju masi bingung....

"Bet rasa... kalo dong cum isi waktu deng tarohan cum skali maen taro sapulu ribu ato taroh lima ribu... bet rasa itu ju biasa... itu namanya supaya tamba samangat....karna pengertian berjudi... tuh barmaen taruhan dalam jumla basar untuk tujuan sebagai mencari nafka hidup... padahal bet rasa dong itu bukan cari nafkah laeee... cuma iseng sa isi waktu ko maen kartu sambil pasang taruhan," kata Bai Ndu.

Ina Feok jua su batamba....

"Beta ju satuju deng lu pung pikiran.... bet rasa... ini hidop nih musti sante sadiki.... jadi musti barmen apa sa... bahkan ada yang pikiran jahat ko pi maen orang pung kalamin... ini ju bisa lebe jahaaattt karna namanya parkosa.... abis pi ba paksa ame orang maen kalamin.... tapi kalo suka sama suka itu bukan namanya parkosa... tapi bersetubu," kata Ina Feok.. mulai bamong agak porno.

Bai Ndu cum puku testa ko katawa lebar-lebar......

"Ini su katong omong soa barmen judi.... lu pi batamba yang porno ko bilang barmaen kalamin laeee...Ini son nyambung laeee.....," kata Bai Ndu kas sadar sam Ina Feok.

Karna dong dua baomong ngalur-ngidul son jalas.... akirnya Bai Ndu parenta ame sa Ina Feok kow pi mua ame are panas ko bekin kopi panas.

"Lebe bae lu pi buat ame kopi panas ko katong minum dar pada baomong yang son jalas nanti bisa terjadi adu kalamin laee dan bisa ada laporan polisi....," kata Bai Ndu bakalakar sambil cubit ame... Ina Feok daera terlarang di paha yang mulus mo mati saaa... sampe kulit dong ba mera.

Ina Feok takuju karna dar tadi tarnyata Bai Ndu pung mata ada lelehanak pi maloiii ame dia pung daera terlarang di sakitar On the Rock.. dan Sekwila...

"Ini su kalo lu pung mata cu malotot pi sekwilda ato sekitar wilayah dada... ato di On the Rock ato sakitar dalam rok.... nanti muka su mera.. pikiran su kotor na bisa terjadi pemaksaaan kalamin dan adu kalamin yang terpaksa... bukan suka sama suka laeeee....ini yang polisi bisa jerat deng pasal percabulan...," kata Ina Feok. (ferry ndoen).