Pilwalkot Su Selesai Ama Ina

Laporan Wartawan Pos Kupang.Com, ferry Ndoen

BAI NDU dudu di teras ruma sambil cukur kumis sampe klimis.
"beta sanang karna pemilian walikota Koepan su abis. Masarakat su tau pasangan yang akan memimpin kota ini lima taon ke depan. Carut-marut politik amper satu taon deng puncak waktu kampanye ampat hingga waktu coblos tanggal 15 Februari lalu su selesai," kata Bai Ndu.

Ina Feok ju pasang sanyum manis di bibir....
"Beta harapa pasangan yang terpilih na bisa rangkul samu masarakat. Karna ada lebe dari ampat pulu lima persen yang sonde pilih pasangan calon yang menang. Ini artinya, yang menang ju sonde manang mutlak. Jadi sakarang na atur su yang bae ko rangkul samua tokoh dan elemen. Jadilah walikota untuk samua masyarakat Kota Kupang," kata Ina Feok

Bai Ndu jua ikut sanyum manis....
"Beta rasa pebedaan dalam politik itu biasa. Istilanya kalo orang naek ring untuk bertanding, siap kala da siap manang. Siap dihujat, diejek, dicaci.... dan itu biasa. Jua kecap sampe jual tarasi itu biasa dalam politik. Dan inga politik itu ilmu dasarnya tipu-tipu untuk mencapai tujuan. Dalam politik sonde ada kawan abadi dan son ada lawan yang abadi.... semua itu bisa diatur berdasarkan kepentingan.... termasuk menghalalkan samua cara untuk mencapai tujuan. Dan samua permainan su berakhir. Its over," kata Bai Ndu sadiki balagu.

Ina Feok yang dengar Bai Ndu yang baomong soal politik dari jual kecap sampe jual tarasi... dia kawan tape'eee panjang lebar...
"Naahhh.. sakarang samua permainan politik su dipertontonkan melalui pesta demokrasi pilwalkot dan samua program su disampekan. Dan masarakat Kota Kupang su tau samua sapa yang akan pimpin kota ini lima taon ke depan. Masarakat tinggal tagi janji program yang su di obral pasangan calon yang akan mensejahterakan masarakat Kota Kupang lima taon ke depan. Samoga samua janji dalam kampanye bisa terwujud," tamba Ina Feok.

Bai Ndu jua pung harapan yang sama...
"Dia berharap program yang bae yang belum dituntaskan petahana agar bisa dilanjutkan ole pasangan calon ama Jefri Riwu Kore dan kraeng Herman Man," pungkas Bai Ndu. (ferry ndoen)